Kan mamawhte- bawngsa, tomato, purun sen, chi, aieng leh mosola. A zat hi chu i duh ang tawk a ni mai.

Hengte hi pressure cooker ah tui tlem nen minute 40 ka chhum a.

Kan belah tel tlemte ka chuang sa, hmarcha pui leh curry leave tlem ka thlak.

Reilote hnu ah sa chu kan thlak leh a. Reilote kan kang leh a.

Kerala beef fry chu a ei theih ta. Thenawm te pawn a rim an hre tawh ngei ang. Aizawl bawngsa hi chu min 45 ka phit pawn hmin lo te hi a awm thin.

Bonus: Meal for two

1. KAWNG DANG A AWM NGANG LO EMNI LE?

Vawiin hi “Tumkau Ni” (Palm Sunday) a ni (Zak.9:9-9:11 Matt.21:1-21:9, John.12:12-12:16). Lal Isua Jerusalem-a ropui taka a luh Ni hi Jerusalem-ah leh khawvel hmun hrang hranga Kristian-te awmna apiangah Lal Isua Chawimawi nân Tumkau kengin khawlai an fang thin a ni.

Sabengtung hi Ramsa zawng zawnga Hmêlchhe ber pawl, tlâktlai lo, thil zirtir harsa ber a ni an ti. Chu ngei chu Lal Isua chuan, Messiah a nihzia Lantir nân-a chuanna atân a thlang a tlat mai!!! Sakawr chak ţha leh Indonaah pawh zahpuiawm lo tur emaw, Sakhaw puithiam leh Lalnu ten an chuan ţhin Sakawr vâr tal thlang sela! A nih loh pawn, Ramsa huai leh tuarchhel Sanghawngsei (Camel) tal thlang sela ţha tur hi a nia!!!

Ramsa tlaktlai lo tak Sabengtung hmanga Lal Isua, Messiah hian Lal a nihna lantir a, Jerusalem-a a lut hian entir leh min zirtir tum (message) pawimawh tak a nei ang tih hi a chiang hle. Sabengtung tlâktlai lo, rimchhe tak pawh a chuang duh a nih chuan, keini Misual-te pawh hi min hnawl mai bik hauh lovang. Pathianin a ropuina puanchhuah nân min hmang ve duh ngei ang tih hi a rin theih a ni.

A hnuaia Zawhna, “Engtin nge Sabengtung kha, Messiah chuanna atân hman a lo nih theih?” tih leh, “Sabengtung kha Lei leh Van Lal Messiah Lal Isua chuanna atân (hman atân) a tlâk a nih chuan, kei hi Lalpa hman tlâk ka ni ve thei ang em?” tih te hi Chhân pahin Sawi-zau kan tum nghal dawn a ni.

2. PATHIANIN A THLANG TLAT SI ALAWM!!!

Bible chuan, ”Tin, Jerusalem khua an thlen dawnin, Isuan zirtirte pahnih a tir a, “In hma zawn khuaah sawn va kal ta ula, sabengtung thlun, a kianga a no nen, in hmu mai ang; phelh ula, ka hnenah han kai rawh u. Tin, tupawhin in hnenah engpawh an sawi chuan, ‘Lalpain a duh a ni,’ in ti ang a, tin ani chuan a rawn tir nghal mai ang’ a ti a” tiin a ziak a (Matt.21:1-3). Hetah hian thil 2 pawimawh tak kan hmu a:-

2.1. LAL ISUA’N A LO BUATSAIH LAWK DAIH TAWH!!!

Lal Isua’n a Zirtirte a tirh hian, an kalna tur leh thil lo awm tur a hre sa vek a, “Sabengtung thlun, a kianga a no nen, in hmu mai ang.. phelh ula, ka hnenah han kai rawh u… Tupawhin in hnenah engpawh an sawi chuan, ‘Lalpain a duh a ni,’ in ti ang a, ani chuan a rawn tir nghal mai ang” a tih aţang hian, Sabengtung Neitu nen hian Sabengtung chungchângah hian an lo inbe daih tawh a, a lo Hneh (convince) tawh tih pawh a chiang hle.

Messiah mamawh Sabengtung leh a Neitu hi ruahman lâwk ang leh hrilh-lâwk ang thlapin Pathian Hmanrua atân hian an lo inpeih vek tawh a ni tih hi a pawimawh lai ber a ni. A Hmangtu tur Lal Isua’n a rawn lâk-tir hun, a rawn koh hun kha an lo nghâk mai a ni, ti ila kan sawi sual awm lo ve.

Țhenkhat chuan, Pathian ngaih leh mihring ngaihin sual ber, tlâk-tlai lo ber, engmah ni lo, hman tlâk tawh lo, Pathian ngaihdam theih tawh loh sual lian tak khawih angin an inngai mai thei. Fakna Hla pawhin, “Ka sualna zawng zawngte hi miten hre reng ţhin mahse, Lalpa nang erawhchuan I theihnghilh si… Kei bum hmang leh misual, hel hmang ţhin tân pawh hian Jakoba Pathian ngei chu ka Pathian a ni si” a lo tih ang khân, kan fello chung chung, leh kan sual chung chung pawh-a min ngaihdam leh min pawm duhtu Pathian kan nei hi ava lawmawmin, ava ropui tehlûl êm! Bible chuan, “Nangnin mi thlang lo, keiman ka thlang zawk che u a, va rah tûr leh in rah awm reng tûrin ka ruat bawk a che u” a lo ti daih tawh lehnghal (John 15:16).

2.2. KUM 550 LIAM TÂ-AH KHÂN AN LO SAWI LAWK DAIH TAWH!!!

Lal Isua Jerusalem-a a Luh leh a Chuanna tur Sabengtung chungchâng hi Jerusalem a luh dawn hnaih-a Lal Isua’n a ngaihtuah-chhuah chawp (recent plan) mai mai a lo ni hauh lo mai!!! Zawlnei Zakaria’n Kum 550 kal tâah khân a lo Sawilawk daih tawh alawm le!!!

Matt.21:4,5-ah chuan, “En teh, i Lal chu, thuhnuairawlh takin, Sabengtung chungah – Sabengtung no chung ngeia – chuangin I hnenah a lo kal dawn e,’ tiin, Zion fanu chu hrilh rawh,” tia, Zawlnei kaa a sawi kha a lo thlen theihna turin chung chu a lo awm ta a ni” tih kan hmu a. Hei hi Zawlnei Zakaria’n Jerusalem khawpuia Messiah a Luh tur chungchâng a lo sawilawk kha a ni. Pathian ruat leh tirh Messiah a nih avangin Lal Isua chungah khân a vaiin a thleng dik vek a ni.

Zawlnei Isaia chuan, “Chutiang bawkin ka kâ aţanga ka thu chhuak chu a awm ang: engmah tih nei lovin ka hnênah a kir leh lovang a, ka duh ang chu a tizo zawk ang a, thil ti tûra ka tirhnaah chuan a hlawhtling bawk ang” tiin a lo sawi ve tawh bawk (55:11). Hei hian Pathian Thiltum leh Ruahmanna-te hi a rintlâk zia leh a nghehzia a rawn nemnghet a ni.

3. A LO VIRGIN RENG ALAWM LE!!!!

Khaw pakhatah hian, Nupa tuak-thar hi Kohhran dân thianghlim ngatin, Biak In hawngin an innei a. Mahse, mak tak maiin an inneih hnu reilote-ah an inţhat-ţhen ta ringawt mai a!!! A ngaihna kan hre lo hlawm hle! Hun engemaw chen a liam hnu chuan, a pakhat zawk khân, an inneih hmâ aţang tawh khân Ngaihzawng dang a lo neih vanga kha mite nupa kha inţhen an ni tih, kan hre ta chauh a ni!!

Nupui-pasal neih dawn hian, tumahin Mi Second-hand chu kan duh bik lova. Sawi neih neuh kai pawh kan duh chuang lo. Kan duhthusamah chuan, Nula/tlangval virgin, tuma la chuan ngai loh kan duh a ni. Keini Lei-tlang, Vaivuta siam, thih-hnu reilote-a uih nghal mai, thiam tlêm-te nei, thiam loh erawh ngah êm êm si, thawk-chhuak tlêm, mamawh erawh nei tam êm êm si, feet ruk chhunga zal mai tur ni si duhâm chikim-a duhâm pawhin chutianga kan duh uluk a, kan duhkhirh chuan… Lei leh Van Lal, Pathian Fapa, Messiah chuan a Țha-ber leh a Thianghlim ngei a duh ve ang tih hi ngaihtuah a ţul khawp mai.

Lal Isua’n Chuanna tura a thlan Sabengtung kha, Ramsaah chuan a hmêlchhe ber, a lâk-tlâk loh ber a ni mai thei. Mahse, Țhatna leh Duhawmna a nei tlat mai le!!! Bible-in chiang takin min record sak a, “Sabengtung no thlun, TUMA LA CHUAN NGAI LOHNA in va hmu ang” (Marka 11:2, Lk.19:30) tiin. Judaten Sakhaw thila Ramsa, etc. an hman tur hi “Tuma la chuan ngai loh, tuma la hman ngai loh, thianghlim a ni tur a ni” tih hi an ngaih pawimawh ber-te zinga mi a ni.

4. TLÂNGKAWMNA

Bible Ziaktute hian “Lal Isua Chuanna hi Sakawr vâr emaw, Indo Sakawr emaw” tia an ziah theih reng laiin, Pathian Thu Hrilhlawkna a nih avangin an thlâk duh lo. Miin Sabengtung chu nuihzat dawn mahse, Pathian Thu a nih tlat avangin a nih ang angin, a chhiat ang angin an ziak tawp mai a ni. Kan fellohna te, kan sualna te hi kan Chhungte leh Țhiante chuan min Zahpui hle ţhin. Pathian erawhchuan, kan Pathian tih-a awm chu a zak lo tlat thung!!!

Ramsa zinga mawl ber, hmêlchhe ber leh lâk-tlâk lo ber Sabengtung pawh Lal Isua’n a ropuina puanchhuahna atâna a hmang duh a nih chuan, nang leh kei pawh min hmang duh tihna a ni. Tumkau Ni apianga “Hosana Lalpa hminga lo kal chu Fakin awm rawhse,” kan tih ţhin hi, ţawngkam ringawt ni lovin, a taka Pathian hman theih tura kan inpek a pawimawh-zia leh a ţul-zia min hrilh nawn fotu a ni (Mat.21:9). Malsawmna dawng tur ringawt ni lovin, Rawngbawl tura Chhandam kan ni tih hi i hre reng ang u (Eph.2:10).

Lal Isua kan rinna tur leh a rawng kan bawlna turah hian Setana hi Hneh tawh-sa a ni a, min dâl thei lo. Kan Duhthlanna erawh Lal Isua kan pek a, kan nun-a Lal tura kan sawm a ngai. Sabengtung kha a hel te a nih ngawt loh chuan Lal Isua’n a hman duh hunah a hmang mai. Lal Isua’n min hman duh hunah, min koh hunah hman theih kan ni em? tih hi a pawimawh hle.

Tuma la chuanna ngai lo, tuman a chunga thu an neih loh i ni em? Lal Isua hman turin i tlâk em? I thianghlim tâwk em? Lal Isua aia Hotu leh Lal zawk i nunah an awm em? Pathian hman theih turin i inphal em?

… hi han thlir nawn leh ila. Thawveng thin awm tak chu a ni.

Mahse han hawi thlak a bawlhhlawh lo awm hnuk erawh hi chu, awm lo se.

Mipui an tam lem lo

Naupang lawm

Naupang leh zual lawm

Stall pakhat ah dosa an lo nei ve ngei a, a tui lemlo khawp mai

An eizawnna a ni bawk a, an thiam khawp mai

1st. Sunday: KṬP Rorel Inkhawm vawi 6-na, February 27, 2015 zana Mission Veng biak-ina ṭan chu a ṭiak ta. An tuhrelte zingah – Central KṬP-in ram pum huapin Zoram tan chaw ngheia sual thupha chawi ṭawngṭai rual buatsaih te, Youth Recreation Centre pualin KṬP member tin, Aizawl khawpuia mite’n Rs. 50/-, district capital-a mite’n Rs. 30/- leh hmun dang zawnga mite’n Rs. 20/- thawh khawm leh, YRC pual vekin Thawhṭanni zan inkhawm thawhlawm ṭum khat lak khawm a tel.

2nd. Monday: Darlawn RD Block huam chhunga Sunhluchhip khua chuan an khua-in electric eng an neih hmasak ber chu khawtlanga ruai thehin an lawm a, a hmanpuitu Dy. Chief Whip, Pu RL Pianmawia, bialtu MLA ni bawk chuan, Sunhluchhip khuaah hian sorkar Dept. hrang hrang, Rural Development, PHE, Education, Health leh Power & Electricity atangte-in mipui mamawh chi hrang hrang pek an nih thu sawiin, ruihhlo leh sualna chi hrang hrang laka fihlim turin a chah a ni.

3rd. Tuesday: Central Young Lai Association chuan sorkar laka thil pathum phuta February ni 24 atanga lungawi lohna an lantir chu sorkar lamin aw an neih tak avangin an titawp ta.

4th. Wednesday: Pu Lee Joongyu, Ambassador, Republic of Korea leh a thuihruaite chuan Pu Hiphei, Speaker, Mizoram Legislative Assembly an kawm a. Hemi hnu hian Chief Secretary Pu Lalmalsawma an hmu leh a ni. Korean Ambassador hi Pu Song Hin Hwa, Political Counsellor, Embassy of Republic of Korea, Pu Joon Yul Yoo, Chief Project Manager, Hyundai Engineering & Construction Co. Ltd., Pu II Joon Kwon, Managing Director, Doosan Power System India Ltd., Pu In Hwan Ok, Chairman, Posco E & C India Pvt.Ltd., Pu Jinyong Shin, Director, Korean Trade – Investment Promotion Agency, Pu III Whoan Chin, Managing Director, Korea Electric Power Corporation leh Pu Youngeun Song, Managing Director, Time Tech Management, Pvt. Ltd. ten an rawn tawiawm a ni.

5th. Thursday: Supply minister John Rotluangliana leh PHE joint secretary C.Chawnghnuna chuan DCSO East hnenah an ration card an pe lut (surrender). Ration card surender-ah hian ‘For family document only’ tih chhut a nih hnuah a neitute pek leh nghal a ni.

6th. Friday: Mizote kût pui ber, Chapchar Kût chu Mizoram hmun hrang hrangah hlim taka hman a ni a, a hmanna pui ber Aizawlah chuan Lammualah neih a ni.Lammuala Chapchar Kût hmannaah hian Art & Culture minister R.Romawia chu Kût Thlengtu a ni a, chief minister Lal Thanhawla chu Kût Pa niin, Taipei Economics & Cultural Centre (Taiwan) representative Chang Kwang Tien chu khualzahawm a ni.

7th. Saturday: Central KṬP chuan Bawngkawn Brigade rama Gilead Special School thar tur chu hnatlangin a saksak. Falkland Venga Gilead Special School awmna ram chu a neituin a hralh avangin CM Lal Thanhawla’n Brigade ramah sikul sakna tur hmun a pe a, sikul chawlh chhunga sak zawh a nih theih nan CKṬP ruahmannain Aizawla pastor bial pariata KṬP member-te’n hnatlangin an sa ṭan a; mi 300 chuang an thawk chhuak a ni.

8th. Sunday: Kawnpui dai Darnam peng piah, Phulraw lui bulah Sumo AS 11 AC 7733, Lunglei atanga Silchar rawn pan chu a chesual a, a hmunah mi 2 thiin 1 chu damdawiin thlenpui anih hnuah a boral ve leh.Sumo-ah hian naupang 5 leh puitling 9 an chuang a, an vai hian hmam dang vek an ni.
9th. Monday: Excise & Narcotics department chuan Edenthar-ah Lalruatthanga (23), Phunchawng Veng nia insawi hnen aṭangin heroin grams 3.15 an man. Lalruatthanga hi thubuai siam sak a ni.

10th. Tuesday: Sihphir Venglai Presbyterian Kohhran chuan tunlai hian Thlarau Thianghlim pawlna changin nasa takin Pathian chawimawiin an au thin a; Pathianin a awmpui reng avanga lawmthu sawi nan (thlarau lam) tisa ruai chu hlim takin an theh. Sihphir khaw chhunga kohhran pawl danga mite bakah Aizawl khawpui lam atang pawhin chhimtu an thahnem hle.

11th. Wednesday: Mizoram Upa Pawl, Kolasib Sub Headquarters chuan Diakkawn YMA Hall-ah an pawl Assembly vawi 10-na an hmang a, Kolasib Bialtu MLA, Pu PC Zoram Sangliana’n a hmanpui. Kolasib District -ah hian MUP Area 7-ah Unit 36 an awm a ni.

12th. Thursday: Serchhip Saron Venga Pu Saipianga In, chhungkaw hnih luah lai chu bungrua engmah chuh hman lohin a kang ral vek. Pu Saipianga In hi Assam type a ni a, a kan lai hian Pu Saipianga leh an in hnuai luah, Pu Vanhnuna te chhung hi inah an awm lo ve ve a ni. Hei vang hian a kan chhan tak hi hriat a ni ta lo a ni.

13th. Friday: Chief Minister & Chairman, Mizoram State Planning Board Pu Lal Thanhawla kaihhruaina hnuaiah a office conference room-ah Mizoram State Planning Board Meeting neih a ni. He meeting-ah hian Mizorama Skills Development Mission mumal zawk leh hlawk zawka kalpui dan tur sawiho a ni a. National Skills Qualification Framework kum 2018 tawp lam atanga tan tur atana inpuahchah dan tur leh hei hi remchanga hmang a Mizorama training leh education system siamthat leh tihhmasawn anih theih nana ruahmanna siam dan tur kawng hrang hrang ngaihtuah a ni.

14th. Saturday: Mizoram sorkara Home department chuan Aizawl City Surveillance Project hnuaiah Aizawl khawpui chhung venhimna atan closed-circuit television (CCTV) a vuah ṭan ta. CCTV vuah hi Phase I leh II-ah ṭhen a ni a, Phase I-ah chuan Aizawl khawpui chhung hmun 10-ah CCTV vuah a ni a, camera 61 vuah a ni bawk. Tunah hian phase one chauh la kalpui rih a ni.

15th. Sunday: Lawngtlai College Veng mipuite chuan V/C, Young Lai Association leh kohhran hrang hrangte bultumin an veng chhunga sualna chi hrang hrang thleng ṭhin avangin sual thupha chawina hun an hmang.

16th. Monday: Mizoram Liquor (Prohibition and Control) Act hnuaiah Aizawlah zu zawrh ṭan a ni. Zu zawrhna hmun pakhat Millenium Center-ah chuan stock awm zawng zawng chu chawhma chhunga hralh zawh nghal vek a ni a; a zawrhna hmun tur dngah erawh khawtlang mipuite avangin hawn theih an ni rih lo thung.Hetih lai hian, MNF ṭhalaite chuan an party office-ah zu zawrh duh lohna an lantir a; a remchan dan anga la dodal zel an tum thu an puang bawk.

17th. Tuesday: Mizoram Assembly pasarihnaa session vawi ngana chu Assembly House-ah ṭan a ni. Session-ah hian Mizoram Governor Dr Aziz Qureshi chuan thu sawiin, Congress sorkar hnuaiah kawng hrang hrang aṭanga chhiah lak luh a pun thu a sawi. Governor thusawi zawhah INC member Vanlalawmpuii Chawngthu-in Larsap thusawia lawmthu sawina Motion of Thanks a pu lut a, inkhawm tihtawp nghal a ni.

18th. Wednesday: Mizoram Excise & Narcotics Department-a Anti-Narcotics Squad-in Hunthar Vengah Heroin gram 22 leh a neitu nia puh, mi pahnih an man a, hengte hi Lalhruaisangi, kum 28, Hunthar Veng nia insawi leh Ramhmingthangi, kum 39, Zokhawthar, Champhai District nia inchhalte an ni a, an pahnih hian ND&PS Act tlawhchhanin thubuai siamsak an ni.

19th. Thursday: Mizoram Maxi Cab Owner Association (MMCOA) chuan Bawngkawn YMA Hall-ah General Assembly an hmang a, Transport minister John Rotluangliana’n a hmanpui.

20th. Friday: Secretariat Building Annexe -1 ah Information & Communication Technology te kaihhruaina in State Project Committee for Electronics & Mobile Service Delivery Project chungchangah Department hrang hranga Officer kal khawm ten meeting an nei.

21st. Saturday: UPC Kohhrana ṭhalai pawl, Pentecostal Youth Department (PYD) din champha, PYD Day a ni a, Mizoramah tualchhung leh bial huapin intihhlimna leh infuih thar nan te, khawtlang tana thil ṭha tihna ni atante an hmang.

22nd. Sunday: Mamit District, Mamit atanga Km 40 vela hla, Saikhawthlir khuaah chenna In paruk a kang ral vek a, mihring thi leh hliam erawh chu an awm lo. He kangmei chhuakah hian vawk pasarih leh ar za chuang a kang hlum a. Kangmei hi Pu Ronghaka In atanga chhuak tan niin an hmu hmasatute chuan an sawi. Tichuan, a bul hnai vela in te chu a man kai ta a ni.

23rd. Monday: Mizoram RMSA Employee Welfare Association chu RMSA hnuaia laboratory attendant leh clerk-te chhawr zui phutin Vanapa Hall kawtah an pung khawm a, sorkar hotute’n laboratory attendant leh clerk-te chu kum 2015-16 atanga chhawr zui an harsat tawh thu an sawi nia sawiin, HRD Ministry-in an chungchang hi state sorkar kutah a dah a, ban mai tura an tihna engmah a awm an hre lo niin an sawi.

24th. Tuesday: Guwahati aṭanga Aizawl pana tlan Mizo maxi-cab pakhat chu Meghalaya-a Jowai khaw dáiah a chesual a, Gabriel Zodinmawia (28) s/o Biakthanzama, Tuikual South chu chetsualna a hmunah a thi. mi dang pasarih an hliam bawk. Maxi-cab chesuala chuangte hi Mizo Zaimi Inzawmkhawm (MZI), Tuikual Branch member, Guwahati-a hla record-a zin hawte an ni a, maxi-cab pahnihin an inzui a ni.

25th. Wednesday: Mizoram Legislative Assembly pasarihnaa session vawi ngana, March 17, 2015-a ṭan chu zawh a ni. Session-ah hian Bill pali pass a ni a, House-a chhan chi zawhna (starred question) 37 chhan hman niin, unstarred question 17 chhan a ni bawk.

26th. Thursday: Thu leh hla lama a thawh ṭhat vanga Padma Shri dawngtu, Khawlkungi (87) w/o Bualkhuma (L), Mission Vengthlang chu New Life Hospital-ah zunthlum leh thisen sang vangin a thi. Khawlkungi hi September 14, 1927-ah a piang a, January 23, 1960-ah Bualkhuma nen inneiin, fa pali an nei. Zirna lamah pawl ruk thleng a zir a, kum 1941-ah First Lushai Company-ah lutin, kum 1944-ah Air Force-ah clerk hna a thawk leh a; kum 1958-ah PWD-ah clerk hna a zawm a, kum 1991 khan a pension a ni.

27th. Friday: Chief Minister hlui Brig. T.Sailo, h/o Thansiami Sailo Upper Kanan Aizawl chu lung lam thatlohna avangin New Life Hospital-ah a thi. Brig. T,Sailo hi Thuampui khaw lal Vanchheuva Sailo leh Pi Hrangvungi te fapa neih chhun niin Jan 1,1922 khan Thuampui khuaah a lo piang a, 1946 Sept 17-ah Pi Thansiami nen an innei a, kum 1933-ah Pawl ruk a pass a, Govt, High School Shillong-ah lehkha zir chhunzawm lehin 1940-ah Matric a pass a, 1941-ah Serampore College-ah a lut a, Indopui pahnihna a lo chhuah khan 1942-ah Kings Commission-ah lutin sipai a tang tan ta a, 1996-ah Brigadier-ah a kai a, sipai officer chawimawina sang AVSM a dawng a, 1973-ah a pension a ni. Rambuai lai kum 1974-ah Human Rights Committee a din a, 1975-ah PC Party dinin 1978-ah PC Party chuan sorkarna lain Chief Minister a ni a, 1979 Assembly inthlanah sorkar siam lehin Chief Minister a ni leh a, MLA-ah hian vawi 5 thlan tlin a ni.

28th. Saturday: January 9th. a lakluh, Mizoram Governor Dr. Aziz Qureshi (74) chu Mizoram Governor atangin ban a ni. Nikum chho vela kan Governor chiri lutuk chungchanga Supreme Court a kal vang nia hriat a ni. Thu leh awm hma chu West Bengal Governor Keshari Nath Tripathi in min hmui rih ang.

29th. Sunday: Lal Isua khawvela a len laia chawimawi a hlawh ni awmchhun ‘Tumkau Ni’ a ni a; Mizorama Kohhran hrang hrang te chuan an huamchhungah ‘Hosanna’ tiin Lal Isua chawimawiin kawng an zawh.

30th. Monday: District Blindness Control Society bultumin Champhai district-a mite tan Champhai District Hospital-ah ‘Glaucoma Week’ hman ṭan a ni a, Glaucoma detection camp neih nghal a ni. Camp-ah hian mit lama harsatna nei mi 100 vel an inentir a, harsatna nei mi eng emaw zat hmuh chhuah a ni.

31st. Tuesday: T.Romana College principal Dr F.Lalhmingsanga chu superannuation pension-in a chhuak.

Tunlai chu Telecom company ten TRAI ngum an hiat mek a ni awm a. An hlawhtlin chuan Net Neutrality hlauh thei dinhmun ah kan awm tlat. Entir nan, Internet man i chawi tawh a, Facebook leh WhatsApp hman hman hi a hran in ngai leh ta se, i duh a mi? Airtel i hman chuan Flipkart hi chak viau se, Amazon erawh muang over ta se, i duh a mi? Net Neutrality chu e nge anih i lo thlir ang:

Click here to view the embedded video.

Hitler-a pawn a duh lo.

Click here to view the embedded video.

I duhloh takzet chuan online petition hi sign ve rawh.

A ho inti viau mai thei. A ho reng tak a. something.com ah i luh chuan eng dang a awm lo, “Something.” tih tawp hi a ni mai. A siamtu hi fiamthu a duh hmel ka ti.

2002/3/4 bawr vel kha a niang word hrang hrang combination in domain register a ni tawh em, website a awm em tih ka zawn kualna lamah ka hmu chhuak a. Vawiin ni thlengin a khat tawkin ka la check ziah. “Something.” tih tawp hi rinawm takin a lo la awm reng mai a ni.

A domain neitu hian 1995 atangin a la ti nung reng ringawt pawh hi a fakawm ka ti.

Archive.org ah 1999 atangin a snapshot hmuh tur a awm bawk.

Ka website duh ber dawttu chu hei hi.

Click here to view the embedded video.

Kau Tlabung hi PRISM in PIL a thehluh vel chanchin atangin a hming ka lo hre ve a. A hmun awmdan erawh hi chu ka lo hre ngai lova. Hei vawiin chu Pu Vana te video hi ka en a, a hmuhnawm in a ropui ka ti hle mai. Electricity chu ka mamawh a, mahse hetiang hmun nalh kan han khuap hi a uihawm ka ti ang reng.

Video a mi screenshot tlem:

Dr. Cin Khan Lian, Founder & Director of Ar Yone Oo Social Development chuan Australia sawrkar buatsaih Leadership Award a dawng dawn. He chawimawina dawng tur hian tunah Australia lamah a liamthla mek a ni. Dr. Cin Khan Lian hi Zomi zinga Non Governmental Organization (NGO) lam hnathawhna bul tan hmasa tu a ni. Ar Yone Oo Social Development hi Burma ram chhunga NGO mi hriat hlawh tak a ni. Chin state township 6 ah office an neih bakah Burma ramchhung hmundang 12 ah branch an nei bawk. Thawktu pawh mi 120 lai an nei a ni. Sawrkar hriatpuina nen thlapin mipui hmasawn na tur thil tam tak an thawkchhuak a ni. An hnathawhna chu Community Development, Human Rights & Democratization, Gender Awareness leh Peace & Environment huangah te a ni. Dr. Cin Khan Lian hi Zomi Media and Writer Association (ZoMWA) ah President a ni mek bawk. Kan zomi pui in Australia sawrkar buatsaih chawimawina a dawng thei hi kan chhuangin kan lawmpui hle. A kal zelna torah duhsakna sang berk an hlan e!

Ngaihtuah chang ka ngah ta hle mai, ka ngaihtuah nasat poh leh “Mizo” intite kan lo racist zia hi zahtlak ti khawpin ka chiang tawlh tawlh mai chu a ni e. “Mizo” inti-te aia racist hi HITLER bak kha an awm dawn em ni chu le aw, ka ti deuh hial thin bawk.

Mongol thlah hrang hrang indo reng mai huikhawmtu leh ram pakhata dintu, Temujin (Chinggis Khan) kha chuan, an chak theih zawknan a hmelma (a chipui Borjigin tribe nilo) pawh a generalah hial a dah duh a nih kha mawle. Keini “Mizo” intite hi chuan, “Mizo” intiten kan chipui nireng si pawh an awmna ram a danglam vang a an identity a danglam-in emaw, an hnam bil tawng an la hman vang hian “Mizo pawh inti duhlo” kan ti leh mai thin nia mawle.

Mizo Union chuan 1947 khan India leh Kumpinu sawrkar ah Lusei vek kan nih loh thu ziakin, “Mizo Memorandum” an thehlut a, tah chuan tute nge Mizo chu chiang takin an ziak lang a ni. A hnu kum 1954 chuan, “The Lushai Hills District (Change of Name) Act, 1954″ hmangin, Lusei chauh huam awm taka “Lushai” min lo tihna thin atang chuan, Zohnahthlak zawng zawng min huamin, “Mizo District” tiin an thlak ta nghe nghe a nih kha.

“Mizo tawng” hmangtute hi kan tam ber a, chuvangin u ber chan changin nau zawk (minority) chu a huikhawmtu nih hi kan mawhphurhna niin ka hre takzet. Tuna kan awm ang hi chuan kan darhin, intifing tak siin hnam leh hnam kan la innghirngho zual telh telh mai ang tih a hlauhawm takzet a ni. Zofa-te luah chin, Burma ram leh Bangladesh velte nen kan insuihzawm tawh kumkhua kher lovang, mahse, “tanrual hi chakna a ni” tih hi hre rengin, identity hman danglam vang emaw mai main inen hrang lo ila ka duhin ka ngen a ni e. Racist ni lovin patriot ni zawk ila kan ropui thei zawk khawp ang.

1st. Wednesday: Mizoramah chuan kan la tih chhin ngai loh School Academic Session tharah hian hun renchem duh zawk na avangin zing dar riatah school hrang hrang ten an tan ta hlawm. Hetih lai hian hetiang hun hmang tur tho private school erawh chuan an la tan ve meuh lo thung. A standard azirin an tlai ban hun tur erawh a hrang thluah thung. Hetih lai hian MSU lam chuan sorkar in he thil an kalpui chhan traffic jam tih ziaawm tumna mai mai nia an ngaih avangin an do thung.

2nd. Thursday: Angeli Lalruatsangi (3) d/o Rohlupuii, Serchhip Chanmari Vengthar chu an ṭhenawmte ek in khurah a tlahlum.

3rd. Friday: Mizoram pumah Isua Kraws-a khenbeh ní, Good Friday hman a ni a, Kohhran pawl hrang hrangte’n urhsûn takin an hmang.

4th. Saturday: West Bengal Larsap, Pu Keshari Nath Tripathi chu Mizoram Larsap hna hmui turin Aizawl Raj Bhavan Durbar Hall-ah Gauhati High Court Judge, Justice Michael Zothankhuma’n a la lut. Larsap lak luhna inkhawmah hian CM, Pu Lal Thanhawla, Minister, Parliamentary Secretary, MLA te bakah sorkar mi pawimawh sawm bik thahnem tak an tel a ni. Pu Keshari Nath Tripathi hi kum 1934 November ni 10 khan Uttar Pradesh-a Allahabad-ah a piang a, a nupui, Sudha Tripathi nen fa 3 an nei a, nikum July ni 14 khan West Bengal Larsap atan lak luh a ni a, November 27-ah Bihar Larsap hna hmui tura lak luh a ni a, kumin January ni 6 khan Meghalaya Larsap atan lak luh a ni leh bawk. Politics-a dinhmun pawimawh tak tak chelh tawh a nih bakah thu leh hla lama tui tak a ni a, Hindi leh sap tawngin lehkhabu thahnem tak a ziak tawh a ni.

5th. Sunday: Kristiante hun pawimawh ber pakhat, Isua Krista, thihna hneha a thawh leh ni, Easter Sunday chu khawvel hmun danga Kristiante ang bawkin Mizorama Kristianten hlim takin an lawm.

6th. Monday: Aizawl District Local Council Election 2015 atana Returning Officers ruatte chu I&PR Auditorium-ah training neih tir an ni a. He training hi Pi H.Lalchhandami, Election Officer, Aizawl in kaihruaiin, he hunah hian Pu K.Lalrohluna MCS, DLAO, Aizawl chuan training a pe a ni. Aizawl Municipal area ah hian Local Council 83 awmin General Seat 392 leh hmeichhe tana reserved seat 143 a awm a. Local Council Election buaipui tur hian Returning Officer 83 ruat an ni. He training ah hian Returning Officer te mawhphurhna leh tihtur te hrilhhriat an ni.

7th. Tuesday: Mizoram sorkar leh Sir Ratan TATA Trust hnuaia North East Initiative Development Agency (NEIDA) chuan Chief Minister’s Office conference room-ah miretheite chawikanna atan thawh dunna thuthlung an ziak. Sorkar thuchhuah tarlan danin, Mizoram sorkar leh TATA Trust inremna ang chuan, Mizoram sorkar lamah chuan NLUP Implementing Board kaltlanga thawh tur a ni. TATA Trust hian kum nga chhunga hmalakna turin cheng vbc. 18.8/- a tum dawn a, chumi hmang chuan chhungkaw 17,000 ṭanpui a ni ang. Thawh dunna thuthlung ziahnaah hian Mizoram sorkar aiawhin chief secretary Lalmalsawma’n hming a ziak a, Ratan TATA Trust Fund aiawhin secretary & chief accountant Burziz S Taraporevala-in hming a ziak thung.

8th. Wednesday: Mizoram Veterinary Service Association (MVSA) chuan Vety Rest House Selesih-ah Annual General Conference vawi 31-na an hmang a, AH & Vety Secretary Pu K.Lalnghinglova’n hmanpuiin, sorkar programme hrang hrangah Vety Department pawimawhna a nasat chhoh zel avangin inpekna thar nena thawk turin kal khawmte chu a fuih a ni. Conference hi chawhma lamah MVSA President, Dr. Lalhmingthanga’n a kaihruai a. Chawhnu lamah rorel inkhawm an neih bakah resolution an pass a ni.

9th. Thursday: Zan khat riakturin Pu Pranab Mukherjee, President Of India chuan a zinvahna tur bika siam Indian Air Force (IAF) thlawhtheihna in Lengpui Airport a rawn thleng. President hi Lengpui Airport ah Governor Pu Keshari Nath Tripathi, Chief Minister Pu Lal Thanhawla, Chief Secretary Pu Lalmalsawma, DGP Pu Dharmendra Kumar, Brig T.C. Malhotra, Commander, 23 Sector, Assam Rifles leh Official pawimawh ten an lo hmuak. A cham chhung hian Governor, Chief Minister, Council of Ministers leh NGO hrang hrang hruaitute a kawm dawn bak ah Mizoram University Convocation a hmanpui dawn a ni.

10th. Friday: Pu Lalbiaksanga (48) s/o. B. Vanlalluaia (L), College Veng Khuangchera Section, Aizawl chu, an kawmthlang lawka College Veng leh Bethlehem Veng inri-na lengkir hnuaia luikawrah thiin hmuh a ni. Lengkirah hian tla palh a nih rin a ni.

11th. Saturday: April ni 13 – 17, 2015 chhunga Cultural Exchange Programme, Shillong-a neih turah Mizoram aiawha kal tur Champhai zirlai 16-te chuan Mizoram an chhuahsan. Heng zirlaite hi Champhai District Sports & Youth Office-in a tirh niin, Pi R..Lalnunmawii, Assisstant Organiser (G)-in a hruai a ni. Cultural Exchange Programme hi National Programme for Youth Adolescent Development (NPYAD)-in a buatsaih a ni a. NPYAD hi Sorkar laipuia Ministry of Youth Affairs & Sport hnuaia grant-in-aid scheme pali finkhawma siam niin, adolescent (kum 10-19 chin) leh youth (kum 13-35 chin)-te tan kawng hrang hranga hmasawnna leh hnam inpumkhatna atan activity hrang hrang a buatsaih thin a ni. NPYAD hian NYKS, NSS, Scouts & Guides, State Sorkar hnuaia Youth Organisation-te leh School, College leh University-te a tinzawn deuh bik a. Tuna Cultural Exchange Programme Shillong-a neih turah hian Champhai school pathum – Govt. G.M. Higher Secondary School, Govt. G.M. High School leh B.C. English Academy atang te in zirlai thlan niin, hnam lam hrang hrang an entir dawn a ni.

12th. Sunday: United Pentecostal Church (North East India) kohhran inkhawmpui lian ber, General Conference vawi 47-na, April 9, 2015 zana New Saiha High School field-a ṭan chu a ṭiak. He inkhawmpuia an thurel zinga pakhat chu Sunday School kumpuan atan ‘Kan fate i chhanhim ang u’ tih an thlang.

13th. Monday: Durtlang khuaa YMA Joint Action Committee (JAC) huaihawtin darkar hnih chhung Durtlang huam chhunga kawngpui siam ṭhat phûtin Leitanah mipui an pungkhawm a, kawngpui an dang chat. Leitanah hian inkhawm tawi buatsaih a ni a; Durtlang YMA JAC chairman R.Lalpeka’n a kaihruai a, Durtlang, Durtlang North leh Leitan branch YMA aiawhte’n thu an sawi. Mipui pungkhawmte chuan Durtlang mipuite’n kum 30 hma lama kawngpui zauhna atana ram an pek tawh hnuah, tun thlenga hmalakna leh kutthlakna a la awm lo chu hriatthiam har an tih thu leh a rang thei ang bera kawngpui siam an phut thu resolution siamin an tarlang.

14th. Tuesday: Lunglei South Thalai Kawngtha Duh Pawl-in Hrangchalkawn leh Lunglei inkar kawngpui, NH 54 (A) bakah Hrangchalkawn atanga Lawngtlai panna kawng te, Luangmual atanga Tlabung panna kawng te, Lunglei atanga Zobawk panna kawngte chu
tiam chin awm lovin an dang ping. Kawng an danna chhan hi Hrangchalkawn leh Lunglei inkar kawng, National Highway 54 (A), KM 8 leh a chanve a thui, chhe lutuk siam that thuai an phut vang a ni a, hemi bakah hian (a chunga tarlan tak ho khi) kawng dang pawh siam tha turin sorkar an phut bawk.

15th. Wednesday: Zan khat riak tura Mizoram lokal, Development of North Eastern Region (DoNER) Minister Dr. Jitender Singh chuan Aizawl lo thlengin, tlaiah Chief Minister Pu Lal Thanhawla chu a chenna bungalow-ah a hmu. Chief Minister hian duhsakna thilpek alo hlan a, Mizoramah DoNER Ministry ina a hmalakna tlangpuite an sawi dun a; heng zinga bengverh ber chu Aizawl atanga Delhi thlawhna service a awm theih nan theihtawp chhuah a nih thu a sawi hi a ni awm e. Dr. Jitender Singh hi Pu A.M. Singh bakah a Additional Private Secretary Pu M.Venkatesan in an rawn tawiawm a ni.

16th. Thursday: Mizoram Police-te’n Silchar-ah HPC(D) hruaitu pathum, an pawl sipai hotu invuah, Lalropuia Famhoite, kum 47, Churachanpur-a Rimawia fapa, HPC(D) Finance Secretary, Norbar Sanate, kum 46, Assam, Hmarkhawliana Khupa fapa leh Ngurthantluanga Sanate, kum 29, Churachanpur-a Siamlien fapa chu an man.

17th. Friday: Mizoram Synod Choir chuan an music video thar ‘Lalṭhuthleng kiangah’ tih chu Upa Zonunmawia, Central KṬP General Secretary chuan Synod Choir Cabin, Synod Conference Centre-ah a tlangzarh. He music video hi Synod Choir, 2014-16 term chhunga mite music video hmasa ber a ni. Mizoram Synod Choir-ah hian tunah hian conductor tiamin mi 23 an awm mek. Tun term-a mite hi nikum September thla aṭang ṭan kha an ni.

18th. Saturday: Haulawng bial ṬKP chuan Lunglei Civil Hospital-ah thisen unit 96 an pe a, a petute mipa 65 leh hmeichhia 31 an ni.

19th. Sunday: Salvation Army, India Eastern Territory chuan Aizawl Temple Corps-ah hun puma rawngbawltu tura inpe mi 23, Heralds of Grace Session te dahnghehna leh tirhchhuahna, Commissioning & Ordination hun an hmang. Heng mi 23 te hi India Eastern Territory hmun hrang hranga mi te an ni a, thla 22 chhung Officers Training College ah an training hnuin Officer turin Territorial Commander, Commissioner Lalngaihawmi’n a dah nghet a ni.

20th. Monday: Mizoram leh Tripura inri-na, Langkaih luia thir lei chu siam that a nih laiin a chim. Lei hi a chhiat tawh avangin siam tha tura hnathawh a nia; hmanraw thenkhat, JCB hmanga pawh tawlh a ni a, hetah hian thil tih sual palh a awm avangin lei hi a chim ta a ni.

21st Tuesday: DIC Training Hall, Saiha-ah Pu C. Dokulha, Manager, District Industries Centre, Saiha kaihhruaina hnuaiah District Industry Department chuan NLUP 2nd Phase- a Trade hrang hrang thlangtu Beneficiaries 129 hnenah 3rd Installment atan tangka fai Rs. 38,01,000/- sem a ni. NLUP 2nd Phase 3rd Installment semna ah hian Petty Trade thlangtu chhungkua 109, Tailoring thlangtu chhungkua 9, Steel Fabrication thlangtu chhungkua 3, Automobile thlangtu chhungkua 2, Beauty Parlour thlangtu chhungkaw 1, Bakery thlangtu chhungkaw 1, Tinsmithy thlangtu chhungkaw 1, Blacksmithy thlangtu chhungkua 2 bakah Electronics thlangtu chhungkaw 1 an awm a ni.

22nd. Wednesday: Aizawl DC office chuan Aizawl Bawrsap Pisapui kum 125-na an lawm. Aizawl Bawrhsap Pisapui kum 125 tlin puala hriatrengna lung phek an siam chu pisa gate bulah DC Dr Franklin Laltinkhuma’n a hawng a; DC bangla, Tuikhuahtlangah a lawmna inkhawm neih a ni. Aizawl DC hi The Chin-Lushai Expedition 1888-1889 hming vuahin Surma Valley Military Police battalion-a mi 400-te chu WW Daly-a hoin February 2, 1890-ah Aizawlah an thleng a; tuna Assam Rifles awmnaah an inbéngbel a ni.A tirah chuan bawrhsap pisa chu thing leh mau hmanga sak a ni a, chutiang chu kum 1900 thleng an hmang. Kum 1900-ah chuan tun thlenga la awm, Treasury Strong Room hi lung hmanga sak a ni a, chumi hnuah tuna Aizawl DC office atana hman mek, Bawrhsap Pisapui pawh lung hmang bawka sak niin, kum 1905-ah sak zawha luah nghal a ni.Aizawl bawrhsap chu a tirah political officer tih a ni a, political officer pasarih an awm. Hetih lai hian Mizoram hmar lam chu North Lushai Hills tih niin, Assam hnuaiah a awm a; chhim lam, South Lushai Hills chu Bengal (tuna Bangladesh) hnuaiah a awm thung. Kum 1898 aṭanga 1952 thleng chhim leh hmara ṭhen loin Lushai Hills tih a ni a; bawrhsapte chu superintendent tih an ni.

23rd. Thursday: Mizo Academy of Letters (MAL) chuan kum 2014 chhunga Mizo iráwm chhuak lehkhabu tihchhuah zinga ṭha ber, Book of the Year-ah B.Lalhriattira ziah, ‘Ka zalenna’ tih an thlang a, MBSE conference hall-ah Foundation Day leh Golden Jubilee an lawm naah lawmman hi an hlan.

24th. Friday: Kan hma lawka Village Council inthlan 2015 kan hmachhawn tura tan inbuatsaihna kal zelah District Election Officer Pu Vanlalngaihsaka chuan Mamit District chhunga Political Party hrang hrang aiawhte kawmin an in puahchah dante leh inthlanna felfai leh muanawm tak a awm theihna tura kawng hrang hranga thawhpui zel turin Party aiawhte a sawm. Inkawm hona ah hian Ballot Paper chungchanga buaina leh hriatthiam loh awm theite Election Officer Pu Malsawmtluanga chuan Party aiawhte hi a hrilhfiah a. Hei bakah hian District Election Officer chuan Ballot Paper chu uluk tak leh fimkhur taka buatsaih anih thu sawiin a hun taka semchhuah mai theih turin peihfel vek tawh anih thu a sawi bawk. DEO hian party aiawhte hi strong room a enpui bawk.

25th. Saturday: Central Agriculture University-a College of Veterinary Sciences & Animal Husbandry, Selesih chuan anmahni hmunah World Veterinary Day, 2015 pualin Free Animal Health & Vaccination Camp a buatsaih. Ui â hri danna 100 chuang pek a ni a, ran damlo 200 en niin, a thlawnin damdawi pek an ni a, ran pali zai a ni. World Veterinary Day hi State Veterinary Hospital-ah pawh hman a ni.

26th. Sunday: India rama Baptist ṭhalai inzawm khawm, Baptist Youth Fellowship India (BYFI) inkhawmpui, National Baptist Youth Conference vawi 5-na, April 23 zana Serkawn BCM biak-ina ṭan chu a ṭiak. National Baptist Youth Conference 2015-ah hian ram chhung leh pawn aṭangin palai 800 chuang an kal a ni.

27th. Monday: Mara Autonomous District Council (MADC) CEM RT Zachono chuan cheng nuai 6.1/- senga sak Meisaval West-a basketball court a hawng. RT Zachono chuan MADC-in ṭhalaite infiamna khawvel thar siamsak turin ṭan a lak chhoh mek thu a sawi bawk.

28th. Tuesday: Aizawl District Disaster Management Authority chuan National School Safety Programme hnuaia sikul 250 chuangte tan khuarêl chhiatrupna thlen thulha inven dan tur inzirtirna atan, ‘Inter-School Competition on Towards Disaster Resilient Schools’ an buatsaih.

29th. Wednesday: MBSE chuan High School Leaving Certificate (HSLC) Examination, 2015 result a tichhuak a, zirlai exam mi 17,157 zinga 11,719 an pass a; Jennifer Vanrammawii d/o R.Lalbiaktluanga, Baptist Higher Secondary School, Serkawn chu pakhatna a ni. Pass percentage chu 68.30 a ni a, kum 2014 pass percentage 67.51 aiin a ṭha zawka ni.

30th. Thursday: Mizoram District parukah (Saiha leh Lawngtlai Dist. tel loin) village council leh Aizawl khawpuia local council inthlan a ni a; VC 504 leh LC 83-ah Congress party-in seat 1,317 lain, LC leh VC 308-ah hnehna an chang a, MNF-in seat 918 lain, LC leh VC 165-ah hnehna an chang thung.

1. THU HMATHEH
Vawiin-a kan thu khel tur, “Pastor-in Hotel-a KS (Nawhchizuar) a Tawmpui Chungchâng” hi a tak ngeia hmuh leh kut ngeia man, a nâk ngeia zen chungchâng a ni a. Amaherawhchu, Pastor hming leh KS hming erawh hi chu thup tlat a ni thung. An hming-te hi sawichhuah a țul tlat a nih a, anmahni’n rem an tih bawk chuan puanzar a ni chauh ang.

Khawvelah hian, Thlarau lam thil a ni emaw, Khawvel lam thil a ni emaw, thil âwm leh âwm lo, Thil ni tur leh ni lo tur hi a awm vek a. A nih tur anga thil a nih loh chuan, a dik lo satliah ringawt lova, a tênawm hial zawk țhin. Entirnân, Hnap hi a chhuah (tawlh) chuan thenfai a, hmuh phâk lohvah paih tur a ni. Chutih laiin, paih lovin Hnap tla pur chungin Chaw te ei ila, Mipui hmaah Thu-te sawi ta ila, Miin țawp min tiin, min tên ngawt ang. A chhan chu, Hnap kha a awm lohna tura a awm vang a ni.

Țhian pakhat chuan, “THIL INHMEH LO BER-TE” zingah, “KS LEH KOHHRAN ZAIPAWL-A TEL” tih leh “PASTOR LEH ZU LEI TURA INTLAR” tih te hi a ni awm e” a ti a. Kan Thukhel laia a Changtupa-ber Pastor pawh khian Hotel-ah KS a tawmpui ringawt mai khi… Thil inhmeh lo tawp-khâwk a ni. Mahse, Engah nge Pastor meuhvin Hotel-ah KS a kawm tâk mai? tih hi Zawhna pawimawh tak mai a ni tho bawk. Sâp Thufing chuan, “ENGKIM HIAN CHHAN A NEI VEK” (Everything Has A Purpose) a ti a. Pastor-in KS a Tawmpui hi Engnge a chhan ni ta ang le???

2. PASTOR-IN HOTEL-AH KS A TAWMPUI MAW!!!???
Khami zân zet kha chu ka va hrechiang em!! Ka damchhungin ka theihnghilh tawh lovang!!! Concert a awm avangin Hall bulah mi an zi nuaih nuaih a. Chutihlai chuan, Pastor ka hriat-chian êm êm hian, Pastor incheina pawh inbel lovin, mi-pangngai incheia incheiin Hall bulah Zân dar 9 velah KS a lo châng a. KS nula, kum 25 bawr vel hi a lo kal a, an inbia a. Taxi an phar ding a, an kal liam ta mai a!!! Chu Pastor, a rûka ka lo rin ve êm êm thiltih dân chuan ka rilru hi a tinâ vawng vawng mai a ni.

Chutia rilru nâ taka ka inngaihtuah lai chuan, ka rilru-ah zui rûk châkna ka nei ta tlat mai a nih chu!!! Tichuan, ka Bike ka start vat a, Pastor leh KS-te chuanna Taxi chu ka um ta a. Vanneihthlâk takin Kawng kual laiah chuan Traffic a lo jam a, an lo ding a, ka va umpha ta mai a. Ka zui rû zel a, rei vak lo an tlân hnu chuan, an chhuk a, Hotel pakhata an lut ka hmu a. Waiting Hall-ah ka lo châng a. Darkar chanve hnu velah chuan KS nula chu a rawn chhuak a, a hmêl ațangin a țap tih ka hmu thei a.

KS nula chu pawnah ka va umzui vat a. Ka va au ding a, thil awmzia ka va zawt ta a. Chu KS nula-in a thu min hrilh chuan… min va tizakin, ka rilru a va khawih tak êm!!! Kha Pastor khân, Sex avang awzawngin KS kha a lo kawm lova, Pathian thu a hrilh duh vang zawkin, Pathian thu a hrilh theih nân, amah dawr tur ni-awm takin KS kha a man pe-in Hotelah a lo kalpui a, Pathian thu a lo hrilh țhin zawk chu niin!!! Lalpa Rawngbawltu tak tak-te hi chu a rûka an nungchang leh an awmdân leh an rawngbawlna te hi belhchian ava lo dawl tehlûl êm!!!

Keimah ka in-enlet a, pâwnlam lang theia nungchang țha êm êm ka ni a. Chhungkua, Kohhran leh Khawtlâng tâna mi țangkai tak, KȚP-a hruaitu, langsâr rawngbawlna ngaisâng êm êm, “KS leh Drugs Ngawlvei-te chu Hrêmhmunah kal vek se” lo ti ngawih ngawih țhin-tu kha ka lo sual zia ka in-hrechhuak a, Țha ka intih êm êm-na sual-te sim a, Pathian hnena ngaihdam dil ka mamawh hle tih ka in-man chiang khawp mai.

3. LAL ISUA’N HMEICHHIA A BIA ELO!!!???
John 4:1-26-ah Lal Isua leh Samari Hmeichhia an inbiak chungchâng kan hmu a. Hei hi Judate tân chuan Thilmak tak a tling. Judate hian Samari mite hi Hnamdangte nên-a an inneih-pawlh avangin an ngeih lova, an tên êm êm a, an be duh lo. Tin, Judate hian Hmeichhia hi an dah-hnuai hle a, “Lalpa, Hmeichhiaa min siam loh avangin ka lawm e” tiin an țawngțai țhin!!! Hei bâkah, Judate Sakhaw hruaitu, Rabbi-te chuan, Temple-ah leh Vantlâng zingah tih lohvah chuan, Hmun fianrialah chuan Hmeichhia an be mai mai ngai lova, “Sakhaw Puithiam-in a fala Hmeichhia a biak chu a thiang lo” tih ang hialin ngaihdân an nei a ni.

Chuvangin, Lal Isua’n Samari Hmeichhia a biak hian Judate Dân 2 lai a bawhchhia tihna a ni. Zirtir-te pawhin Lal Isua’n Hmeichhia (Samari-mi lehnghal) a lo bia chu mak an ti hle tih a lang a. Mahse, Zirtirte hian an zah êm avangin a ni ngei ang, Lal Isua hi engmah an zawt ngam lo!!! Hei hi Bible pawhin chiang takin a record (cf.John 4:27). Lal Isua hian Mihring Dân leh Ramri kham hi ava bawhchhe nasa êm ve le!!! Hemi avang hian, Pathian mihringa alo chang te, Kross thu-te chu Greek mite leh Judate tân chuan awih a harsa lutuk a, an tân tlûkna a ni ta rêng a nih kha (1Kor.1:18-31, etc.).

4. THÛK ZAWK LEH ZAU ZAWKA RAWNGBAWLNA
Bible Scholar-te chuan, Lal Isua’n misual-te min chhandam tura Vân ropuina kalsan a, a Vân ropuina zawng zawng hlip-a lei hmun tlâwm ber-a, mihringa a lo chang kha inpêkna ropui leh rawngbawlnaa kan entawn tur ber (Incarnational Model) a ni, an ti (cf.Phil.2:5-11). Rawngbawl sak tur-te level-a inphah hnuai leh indah-hnuai ngam-te hi rawngbawltu hlawhtling ber ber-te an ni fo thin. Hei hi Rawngbawlna thûk ber a ni a, Lal Isua Rawngbawlna chhunzawmtu tak tak-te an ni, an ti țhin bawk.

He Incarnational Model-ah hi chuan, midangte damna tur leh chhandamna an chan theihna tur a nih dawn chuan, mihringin ramri (boundary) an siam-te an pel a, an bawhchhe țhin a (thil sual tih duh vang ni lovin). Mihringin mawi leh mawi lo a tih-te chuan an nun-ah awmzia a nei tawh ngai lova. Mahni lam hlâwkna aiin, mahni lam ralna leh chânna-in an nun-ah a thawk zawk țhin. A hrethiam ve lo-te mitah chuan, an hmêlhem a, an rimchhia a, an hmuhsit a, sawichhiatin an awm țhin.

Samari Hmeichhia khân, Chhandamtu a mamawh êm êm tih Lal Isua’n a hria a. A chipui te leh a Zirtir-te pawhin nuihzatin, Hmusit dawn mahse, a pawi ti lo. Samari Hmeichhia a lo biak a, a lo kawm a, in tur a lo dil hial kha… Samari Hmeichhe thlarau nun a vei vang leh a saltânna ațanga a chhanchhuah duh vang a ni zawk. A Zirtirte khân chu chu an man pha lo!!!

Lal Isua’n a rawngbawlna hmanhmawh-thlâk tawh zia leh pawimawh-zia a hrechiang si. Khawvelin Lal Isua a mamawh êm êm a. Setana’n hmanhmawh takin Lalpa Hmangaihte a sua-sam mêk a. Chutihlaiin, Lal Isua rilru putpuia Rawngbawltu erawh an tlêm êm êm si!!! Lei leh Van Lal chuan mangang takin, “Dâk ulang, Lote en rawh u, tûn apangin seng tûrin an êng a ni… Buh seng tur a tam hle si a, nimahsela, a Thawktute an tlêm, Chutichuan, a buh seng tura thawktu tûrte tir tûrin Buh Neitupa hnenah chuan ngên rawh u” tiin, a au lawm lawm a nih kha (Joh.4:34:38, Mat.9:37-38).

Zoram Kohhranah ngei pawh, Kohhran Pawl ramri te, Kohhran Tihdân-phung te leh Țawng leh Hnam-te hian Krista Ram Lâkna tur hi min va dâl lian nasa ropui êm!!! Zoram Kohhran-te hian, Kelkâng Harhna kan chhim mêk ațang hian LAL ISUA THUCHAH (MESSAGE) hi i Zirchhuak mawlh teh ang u. Kelkâng Harhna hian Kohhran Pawl Ram a țhiat vek a ni lawmni? Speaker Ngaihsân Bik tur a awm lo, Amah Pathian ngei chu Speaker a ni a, Mahni ngeiin, Hmaihmaah ngei kan bia a ni lawmni? Lalpa Hmanrua-te chu ava tlâwm êm!!! Mihringin kan rah mai mai Sawntlung Lei a ni mai!!! Kelkâng Khuate Inpêkna-te hi ava ropui êm!!! Jerusalem Kohhran Hlimthla kha a lang. Thlarau Thianghlim hi Hnathawk lo thei lovin an siam alawm!!! Aw, Zoram Harh Rawh!!! Harh Mawlh Teh!!!

5. THU TLIPNA
Ringtu inti țheuh si hi, Rawngbawlnaah hian Hmingchhiatna, Chânna, Hmuhsitna, Sawisêlna, Mualphona tel zâwng a nih chuan, kan peih lo tlângpui a. Chutihlaiin, Chawimawina leh Hmingțhatna leh Hlâwkna tel zâwng a nih erawhchuan, kan phûr tlâng viau hlawm si!!! Entirnân, Mizoram University-ah VICE CHANCELLOR turin min sawm ta sela, “Rawngbawlna zau zawk a nia…” tiin, tawi khawmuang lovin ka zawm nghal ang. Mahse, Mizoram University-ah tho hian, “PEON” hna thawk turin min sawm ta thung sela, “Rawngbawlna zau zawk a nia…” tia zawm nghal mai chu harsa ka ti leh hle si ang!!!???

Khawvel lam thilah chauh nilovin, Rawngbawlna thilah takngial pawh hian, Mihring chuan a chungnung leh a hnuaihnung hi kan lo dah hrang fo țhin tih hi a chiang hle. LAL DAVIDA CHUAN, PATHIAN RILRU KHAWIH-CHE PHÂK RAWNGBAWLNA HI A HNA (DINHMUN) A SÂN LEH HNIAMAH A INNGHAT LOVA, RILRU LEH THILTIH (MOTIVE & ACTION)-AH A INNGHAT ZAWK A, CHU CHUAN PATHIAN A TI-LAWM ZAWK TIH A HRECHIANG HLE. Chuvangin, “Suahsualna Puan In-tea awm ai chuan, kan Pathian In-a kawngkhâr vengtu nih pawh ka duh zawk” a lo ti hial a nih kha (Sam 84:10).

Rawngbawlnaah hian, dinhmun leh nihna țha tak thawk chunga Lalpa kan ti-lungawih dawn loh ai chuan, dinhmun leh nihna hniam-tê thawk chunga Lalpa a lungawih kha a țha ber a, a thlanawm ber tih hi i hre thar leh teh ang u. PASTOR KS TAWMPUI RAWNGBAWLNA ropui tak hi Paula chuan, “PIAH LAM RAM RAWNGBAWLNA” tiin a vuah a (2Kor.10:16). He Rawngbawlna thûk zawk, Midangte tâna inpêk zawh vekna, mahni lam mualphona leh ral vekna leh chân zelna kaltlanga, Misualte, Mihnuaihnungte, Ringlote hnên thleng phâk Rawngbawlna hi Lalpa rilru leh Lalpa lungawina a ni. Ringtu i zawh ve dawn em le???

Naute in nei tawh em?
Nei tawh ta se,
Thla engzat nge a nih tawh?
Kum lo tling tawh se,
Kum engzat nge a nih tawh?
kum e nge maw zat lo ni tawh ta se,
School a kal tawh em?
School kal tawh ta se,
Pawl engzat nge a nih tawh?
Pawl enge maw zat lo ni tawh ta se,
Matric a pass tawh em?
Matric lo pass tawh ta se,
College a kal tawh em?
College lokal tawh ta se,
Eng tikah nge a zirchhuah dawn?
Lo zir chhuak tawh ta se,
Hna a thawk tawh em?
Han lo thawk tawh ta se,
Nupui/Pasal a nei tawh em?
Nei tawh ta se,
Naute an nei tawh em?

Tunlaiin mi kan tul em em tawh a; chutih rualin taksa insen erawh thenkhat tan chuan a harsa lutuk lem chuanglo maithei. Amaherawhchu, sum leh pai erawh in sen a har tawh khawp mai.

Mizoram khawchhak lam Kelkang khuaah chuan Thlarau hnathawh mak tak mai tunlai hian a thleng mek a; heihi tunhnaia thleng mai niloin kum hnih liam taa lo intan daih tawh kha niin an sawi. Tin, tun hma pawhin he khuaah hian harhna hi lo thleng tawh thinin hemi avang hian sorkar lam hotute pawhin an kamkhat hial niin an sawi. Harhna hi an dawng mawlh mawlh mai niin a lang a; 1919 Krismass leh 1920 kumthar vel khan hlimna a thleng a; hetih hun lai hian tahna leh sual inpuanna a nasa hle. Heihi harhna an tawn hmasak ber hun chu niin an sawi. Tun tum harhna kha 2013 May thla vel atanga intan niin an sawi bawk. Sawi tak angin harhna hi an thleng deuh mawlh mawlh maia; 1937 kuma an harh kha an hminthan pui tak bera chu a ni.

He khua hi Aizawl atang chuan kms 214 vel bawr nia ngaih a nia; Mizoram khawchhak lam Champhai district chhung a awm niin Champhai atanga chhim lam Zokhawthar kawngah kalin, kawng lakah Mualkawi khuaah a peng a; ding lamah pengin Vaphai kawngah kalin peng atanga kms 10 velah he Kelkang khua hi a awm a ni.

Kelkang khua hi khaw upa tawh tak a nia; 1930 vel pawh khan sorkar hmun pawimawh tak a lo ni tawh thin niin an sawi. A ram a rem a; feh kawng chhuk chho chhia pawh a awmlo. A ram a that avangin buh ei lamah pawh khaw intodelh tak nia sawi thin anni.Tin, sipai hmun a ni thin bawk a; a hmun a nuamin thing leh mau vel pawh a la thahnem hle.

A khua hi Presbyterian kohhran khua tih mai theih tur a ni hial ang chu; Roman Catholic kohhran in hnih an awm ve tih mai loh chu Presbyterian kohhran vek niin an khuaa pa pakhat chuan min hrilh. Presbyterian kohhran hi pahnih awm vein tuna harhna thlenna hmun hi a veng sang zawka awm niin a ziding zawk anni.A khua hi a han tlangsang deuh bawk a; khaw hawi vel pawh a nuamin Burma ram lam pawh thui tak thlengin a hmuh theih a ni. Tun tum V/C election khan member pangaah Congress in V/C pali neiin sorkar na an siam a ni.

An kohhran Biak In hi tunah concreat a rel mek a niin a ruhrel chu an zo tawh a; he hmunah hian zantin inkhawm awmin an kohhran comt. ten thuchah an insawi chhawk thin.

Tuntum kan zin hi kohhran ho in thalai lam pual a a buatsaih a ni a; thalai lam pual mah nise nu leh pa bakah naupang thleng pawhin kan ni nawk tho mai.

Zing dar 5:31-ah Kawnveng (Sihphir) atangin bus pahnihin kan chhuak a; tluang taka tlan zelin Keifang kan tlan pelh hnu, kawng chhuk engemawzat kan tlan hnuin kan hma lam hla taka motor ding thup kan hmuh chuan kan ngaih a ti thalo hle. Mahse, kan zuk nan hmain an lo kal leh hman a; a lawmawm hle. Bus pakhat a lo ding a, a hma lam sawi bawiin a darthlalang a lo keh vek bawk. Driver kan zawh chuan an hmaa tlan a din thut avangin a break hman silo a; a su ta bur mai niin a sawi. A hnua ka hriat leh danin Zemabawk kohhran ho phur a lo nia; a hmaa scooty tlu avanga he chetsualna hi thleng ta mai niin a lang. A suta te pawh an zinga mi tho annih avangin thubuai hla buaiah an la ta lo hlauh. Hliam tenau chu an awm ve naa; zin thulh tham erawh a ni lemlo hlauh.

Tuirini lui kan thleng thlaa; kan chawfun theuhte thetin puar el euhin chaw kan ei hlawm a; a nuam khawp mai. Chaw pawh ei mumal loa pp tur thla lo la ngat ngat te pawh an awm hlawm in ka hria!!

Khawzawl khua kan thleng chho a; chhun riltam hun a lo ni ta bawk a; sawhchiar tui tak mai kan ei chuan hah a ti dam sawng sawng mai. Aieng tello a nih vang pawh a ni mahna.

Tichuan, tluang taka tlan zelin Champhai khawpui kan lut ta rup mai le. Venglai KTP ho hotel siamah chuan chaw tui tak kan ei a; a hmain kan chaw ei tur thu sawi lawkin a zat tur nen kan hauh lawk a ni. Hun hmasa lamah kan veng mi tho in chaw ei man pelo an lo awm nge ni, ninawm khawpa an fir erawh an ngeiawm tep. Sawi tak angin chaw leh a hmeh erawh a tui khawp mai.

Tluang taka tlan zelin zan dar sarih velah kan tum ram chu kan thleng ta. Mi chitin chitang kal khawmna hmun a nih tak avangin harhna chhima kal mah ni ila; security an uluk ve hle.

A hma lama chhungte kal an lo awm tawh avangin an thlen ina thlen ve ka duh sia; fon hmangin in neitupa hming ka zawt a; ‘Lalrinthanga’ a ti niin ka hria. Security nula I chuan Lalrinthanga an awm loh thuin min chhang. An khua chu an in hrechiang hle tih a tilangin an khaw len lemloh zia a tilang chiang hle in ka hria.

Thlen zan hian kan inkhawm hman ta lo rau rau bawk a; tawngtai pawhin kan chhuak ta lemlo.

A tukah tawngtaina tlangah chuan kan kal taa; chawhma dar 10:30-ah ‘Hmun Thianghlim’ –ah hunserh hmangin tawngtaina hun te kan hmang a; chumi hnuin mahni remchan dan ang zelin tawngtaina hmun an siam hrang hrangah chuan kan kual ta a ni.

Tawngtaina hmun hi ‘Hmun Thianghlim’ bakah Gilgal, Moria, Getsemani leh Peniel te a awm a; heng zingah hian Gilgal hi a nuam ber in ka hria. Josua leh a hoten Jeriko kulh an beih lai ang deuh khan ngawi rengin vawi ruk kan kual hnuin kan aw neih tawpin hnehna puangin Pathian kan chawimawi a; Pathian Thlarau Thianghlim pawlna kan dawng nasa hle. A hmun hi a zauh angreng avangin a group ang pawhin kual hi kan tam viau mai thin a; keimahni lo kha chu vawi ruk kual chhung pawha an au reng avangin midang thawm a rin zawk chang a awm a; kan au sual nawk nawk mai. Han nuih dar dar changte pawh a awm. Phun sual ngaihna awm lo khawpa hruaitu au hriatloh chang pawh a awm.

Helai hmunah hian a ni, vang kunga kross awmna kha ni. Mahse, lo awm tawp nia ngaih mahnise, ker chawp niin ka ngai tlat mai pek a. Ka hlut lua lemlo.

A chhak tlangah hian Moria tlang a awm leh a; Abrahama’n afapa Isaka a hlanna hmun kha a ni. Abrama thinlung thianghlim zia leh Pathian tana a inpek zia te sawiin kan leader chuan Pathian tan hian kan thil neih ang ang te ui lo tura min fuih hnuah hlim takin kan tawngtai leh a.

Getsmani-ah kan kal leh a; Lal Isua tuarna hre reng chungin kan tawngtaia; thinlung a khawih thar hle. Getsmani huan hi a tak ngeia kal tawh ka ni na a; helai hmuna ka kal hian Pathian pawlna ka dawng chhah mah zawkin ka inhria.

Hemi hnu hian a thlang lawka awm Peniel hmunah kan tawngtai leh bawk. Jakoba leh Pathian Jabok lui kaia an inbuan khan Jakoba malpui ruh a ti pelh a nih kha. Pathian chuan mal a sawm a; hming thar ‘Israela’ a lo ni ta bawk. Hetiang a nih avang hian Peniel vuah a lo ni ta a nih kha. Kan leader te chuan Pathian malsawm tlak nun nei tura min sawmin hun thar leh hming thar nei ve turin min fuih hnuin kan tawngtai ve leha; tawngtai pawh a kal hle.

Moria leh Peniel inkarah hian tawngtaina tura ruahman ni chiah loin ‘Paradise’ tia vuahin hmun thengthaw nuam lai takah hmun a awm bawk. Helai hmun atang hian Kelkang khaw chhung vel pawh a lang chiang hle. Hetatang hian alawm a chunga tarlan Burma thlenga a lanna ka tih kha.

Tin, Gilgal leh Moria inkar ruam laiah hian ‘Damna Sawntlung’ an tih mai a awm a; chu sawntlung chu mi’n an ei a; mak tak maiin damna an chang thin. Miin a lei hi an lak nasat tawh avangin a kaw rul tawh a; a luhna hmun thumah awmin a chhungah hian mi sawm dawn lai an leng a ni. Tin, he hmun hming hi ‘Gilied’ tih a ni bawk. A lei hi miin la in kan ei a; a duhthawh zual deuh phei chuan an hawn hial thin. Thenkhat phei chuan an hralh hial nia sawi a awm bawk

Mak tak mai chu kan tlawh tumhnihnaah hian camera ka keng a; mahse, mihlim thenkhat a velah an lo tul nasa mai. Thlalak an khap bur mai. Kal lamin thla chu ka la theilo phawt. An phallo tih hrereng chungin hawn lam chuan ka’n la lui ale, mihlim ho chu te teng tungin chungin an let tawp mai. Eng rau emaw tak zawng a awm chiang alawm. A hmun hi he tlanga ka ngaihhlut ber a nih avangin luh leh ngei ka duh si, mihlim ho khan min lo hria anga; min hau hrep mai ang tih ka hlauh zia kha.

Tichuan, hlim taka Pathian Thlarau Thianghlim pawlnaa hun kan hman hnuin zan thum kan riah hnuah kan khua panin tluang takin kan haw leh ta a ni.

Kelkang khuaah hian tui a harsa hle mai a; PHE dept. lamin tui an supply reng a; a ziaawm phian. Tin, a hna chak vaklo mahse, khaw daiah tuikhur a awm ve bawka; a lun thei char char hle. Khawlaia mi pakhat ti ti ka hriat dan chuan ‘Tui hi an harsa em em paw’n ka hrelo. Hetiang zat hian min rinpui ve sela khawi veng mah hian kan dawl loang,’ a ti. A dik thawkhat viau in ka ring.

Tunhmaa mihlim kalta thenkhat thusawi an sawichhawn dan chuan “Kelkang khuaah hian buhfai a la sur dawn,” an ti a ni awm a; mikhual kalte hian buhfai hi kan ei tawk aia tam hret zel kan pai hlawm thin avangin buhfai chu an hnianghnar viau maia; mihlim ho thusawi kha a thleng dik taa ngai pawh an awm hial. A ni reng lah taka; buhfai bag an tiang er ur hlawm mai a. Retailer paw’n buhfai hralhna tur an hrelo hial niin thu uar zual thenkhat phei chuan an sawi.

Ka ngaihtuah mai mai a; a khua amite hi an rau vek kher awm siloa; thenkhat chuan an ning ngawt ang tih hi.

Zan inkhawmah upa hoin thuchah an insawi chhawk thin a; (mikhual hi pastor chin lo chu rawngbawltu lar tak pawh nise an puangzar zen zen lemlo) Bethel tlangah khan hetiang deuh bawk hian upa ho khan hun hi an hmang thin bawk a ni. Tin, tawngtaina hmun hrang hrangah te khan an kohhran hruaitute tihdan hrelo leh mi chitin chitang kalkhawm kan ni bawka awmherh deuhte vengin a khattawkin an inzar pharh bawk.

Thilpek pawh hi nihnih chauh kan cham chhung khan mi thahnemngaite atangin nuai a chuang ve ve a; hei vang hian kohhran ang zawng chuan an harsat phah lemin ka ring loa; mahse, kohhran a a kul ataia inhmang chin chuan an tuar ve phian chuan ka ring. Lo neia ei zawng anni tlangpui sia; hma pawh an lak theihloh phah dawn a ni. Mahse, hetih mek lai hian member satliah ho erawh an leh awl phian lawi. Zan inkhawmah lah mikhual ho an kian duh thin bawk si.

‘Kelkangah kal kher a ngai lo’ tih leh a kaltena kan zawhna dawn tam tak chu ‘I han kang zo em?’ tihte hi a ni awm e. Ni e, Kelkang kal hi tullo nia ngai tan chuan a tullo viau reng bawk a ni. Mahse, tha ka tihna ve chu ka tawngtai tam phah na kha a ni. Mahni thuin in lamah ka peih der silo. Tin, ‘kang zo’ tih lai hi chu tlema chang chhah (thlarau) deuh tan lo chuan ka hrethiam ve mang der lo mai.

A chunga sawilan tak ang khian Kelkang khua hi thingtlang khaw hla tak mah nise, an in leh lo te a changkang angreng phian. Pathianin khaw mipui te a duhsak hle. Leiah Vanram an tem lawk a ni ber e.

Kelkang harhna ropui tak chhim tura kal hi kohhran hrang hrang 500 vel lai kan ni tawh a; phai lam mai bakah foreign atang pawhin kal hi a khattawkin an awm ve reng bawk a ni. Engtia rei nge he harhna hian a thlen dan tur hriat a la ni lo a; an la kal belh zel turah pawh ngai ila, a sual lo ang.

Kan member hlun tak leh active thin tak zualbonez (Lalmuanzuala s/o C.Ropianga IAS Rtd, Khatla)chuan tukin zing dar 8:30 khan kal tha lo avangin chatuan ram min pansan ta. A kalsan tak a chhungte Pathianin thlamuanin awmpui rawh se.

zualbonez hian misual.com ah hian post 33 lai a lo siam a, a post hlui ka enkual naah In Passing RIP tih hi ka hmu a, lung a tileng hle mai. He post-a a changthlan pahnih hi ka lo tarlang teh ang:

Revelation 21:4
And God will wipe away every tear from their eyes; there shall be no more death, nor sorrow, nor crying. There shall be no more pain, for the former things have passed away.”

1 Thessalonians 4:17-18
Then we who are alive and remain shall be caught up together with them in the clouds to meet the Lord in the air. And thus we shall always be with the Lord. Therefore comfort one another with these words.

Ka poem duh deuh pakhat hi ka lo zep ve lawk –

And Death Shall Have No Dominion -Dylan Thomas

And death shall have no dominion.
Dead man naked they shall be one
With the man in the wind and the west moon;
When their bones are picked clean and the clean bones gone,
They shall have stars at elbow and foot;
Though they go mad they shall be sane,
Though they sink through the sea they shall rise again;
Though lovers be lost love shall not;
And death shall have no dominion.

And death shall have no dominion.
Under the windings of the sea
They lying long shall not die windily;
Twisting on racks when sinews give way,
Strapped to a wheel, yet they shall not break;
Faith in their hands shall snap in two,
And the unicorn evils run them through;
Split all ends up they shan’t crack;
And death shall have no dominion.

And death shall have no dominion.
No more may gulls cry at their ears
Or waves break loud on the seashores;
Where blew a flower may a flower no more
Lift its head to the blows of the rain;
Though they be mad and dead as nails,
Heads of the characters hammer through daisies;
Break in the sun till the sun breaks down,
And death shall have no dominion.

1. THU KAMKEUNA
Țumkhat chu Mizorama Thuziak lama lâr tak pakhat hi Kohhran-in Thuhriltu atân rawih kan duh a. Sâwmna Lehkha-te kan thawn a. Min rawn chhân dân aţang chuan, beisei awm riauva kan hriat avangin an khuaa va kal a, va sâwm ngei ngaia kan hriat avangin Zan 2/3 riak turin kan kal ta a. Mahse, ni 2 zet kan inkawm hnu chuan, kan sâwmna leh kan ngenna chu a tih-hlawhtlin theih loh tur thu min hrilh chiang ta a ni. Keimahni (a Sâwmtute) thiam loh a awm lova, amah pawh fellohna leh sawisel tur, ngaihţhatlohna tur thil langsâr engmah a awm lo.

Mahse, min chhânna chu, “Hetiang langsâr rawngbawlna lam hawi hi ka duhloh avangin hmânah pawh mi ka kian tawh a, tunah hian kha kha ka la let leh thei tawh lo. A thiang lovin ka hria” a ti ta tlat mai a ni!! A tirah chuan kan ngaihdân a ni lo viau a. Mahse, kan ngaihtuah thui deuh hnu chuan, a rilru ţhat-zia, zau zia leh a ngaihtuah thui zia leh a rilru ngheh zia kan ngaihtuah chhuak a, kan chhuang rilru ta hle zawk a ni.

Khawvelah chuan, kan hnena awm-a function/program min hmanpui tur te, min ţanpui tur te, min thlamuan tur-te hian kan duh duh kan sâwm thei lova, sâwm pawh ni ila kan hlawhtling vek thei lo. Keimahni a Sâwmtute vang emaw, kan Sâwma-te vang emaw-in kan intawng remchang thei ţhin lo a ni. Keimahni lamin kan zir ngang loh vang emaw, anmahni lam an lian lutuk emaw a nih phei chuan kan tân beisei ngam loh tur thlengin an kat nuk mai a ni.

Chutiang a nih lai chuan, Lei leh Vân Lal, Pathian Fapa Isua Krista dinhmun erawhchu a danglam hle mai. Amah beiseitute tân leh amah mamawhtute tân chuan PEON ang hialin a inpeih sa reng a. A Sâwmtute leh Amah Beiseitute a tih-beidawn emaw, a tih-hlawhchham emaw sawi tur kan hre ngai lo!!!

2.1. LAL ISUA CHU MIN AWMPUITU ATÂN SAWM THEIH RENG A NI
Khawvelah chuan, keimahni (a Sâwmtute) dinhmun-in a zir loh emaw, anmahni (kan Sâwm tur-te) dinhmun-in a zir loh emaw chuan, kan duhzawng mihring kha kan hun pawimawh program leh function atân kan sâwm ngawt thei lo. Kumin January 26, 2015 khân, “Super Power” tih hiala koh U.S President, Barack Obama chu Indiaah Republic Day min hmanpui turin sâwm a ni a, a lo kal thei mai. Obama kha Mizoram-in sâwm ve ta ila, lo kal duh eng-ang mahse, a lian lutuk a, a lal lutuk a, neuh neuh a tam lutuk a, a lo kal hnaisai lovang.

U.S President chu sawi loh, kan Bharat Prime Minister, Narendra Modi tak ngial pawh hi, Saiha-a AMFU program-ah lo kal turin sâwm ta ila, a lo kal aiin, a lo kal loh a rinawm zawk. Zep ţit-ţet lovin sawi ta ila, Saiha AMFU Program hmanpui turin a lo kal piiiit lovang. A chhan tam tak awm zingah, kan Sâwm-a te leh Keimahni a Sâwmtute dinhmun inthlauh lutuk vang a ni mai. A awmzia ber chu, “Lenlai a rual lova, kan intawng remchâng thei lo” a ni ber e. Prime Minister tân chuan Saiha AMFU program chu a tê lutuk a, “ZAWH DAWRA SUK TIN” ang vel a ni, a ngaihna a awm thlawt lo!!

India ram ropui tak pawhin a duh hun hunah leh a duhna hmun hmunah U.S President hi a sâwm ngawt thei lo. U.S. President chu sawi loh, kan Ram, India ram Prime Minister ngawih ngawih pawh Saiha AMFU program-ah kan sawm hlawhtling thei dawn miah lo. Chutiang chu he khawvela Lalte dinhmun a nih laiin, Leilungte din a, mihringte min siam a, min tlan tura a taksa leh nunna kan tâna inpe zo vektu Lei leh Vân Lal Isua Krista erawhchu, Sâwm hlawhchham a awm thei lova, A rethei ber aţanga a hausa ber thlengin, lehkhathiam lo aţanga lehkhathiam ber thlengin, mifelte chauh ni lovin, misualte hlei hlei Sâwmna a ngai pawimawh emaw tih tur a ni. Tute tân pawh-a Sâwm theih a nih thu hi amah ngeiin a sawi a, “Nangni thawk rim leh phurrit phur zawng zawngte u, Ka hnênah lo kal ula, Keiman Ka chawlhtir ang che u” tiin, amahin min sâwm zawk a nih chu!!! (Mat.11:28). Lal Isua hi i harsatna leh buaina, lungngaihna leh manganna sutkian sak tur che-in, i nun-a Lal turin tih-takzetin i sâwm ve tawh em???

2.2. LAL ISUA’N AMAH SȂWMTUTE A HNAR NGAI LO
Ka tawn-hriat hi tuman huatah an châng êm lovang chu maw. Evangelist Faktea (H.Lalfakawma) lâr vang lai khân, Saiha lam khân rawih ve kan duh êm êm a. Saiha District-a Kohhran (denomination) lian ber Mara Kohhran leh Kohhran Pawl dangte inthurual khân, Evan. Faktea chu Saihaa Rawngbawl turin an va sâwm a. Mahse, Evan. Faktea hian “Khawpuiah chauh rawngbawl turin Pathianin a koh thu leh Saiha-ah chuan a lo kal theih loh tur thu” a lo hrilh a, an mitirh-te kha beidawng takin an lo haw a ni. Khatihlai kha chuan Aizawla Evan. Faktea rawngbawlna kha a ropui bawk a, Thingtlâng lam (Zo khaw lam) chuan kan chang thei lova, kan Sâwm hlawhtling thei lo a ni ber e.

Khawvela Lalte, Miropuite, President, Prime Minister, Governor, Chief Minister, MLA, MDC leh Revival Speaker/Evangelist leh Zaithiam lâr tak tak-te pawh kan Program min hmanpui tura Sâwm hlawhtlin an har êm êm laiin, Lei leh Vân Lal, Pathian Fapa Isua Krista erawhchuan, Amah Beiseitute leh Amah Mamawhtute tân engtik lai pawhin a inpeih reng a. Țhenkhat chuan Lal Isua (leh Thlarau Thianghlim) hi PEON ang hialin kan hmang a, kan duh duh ti turin kan hrilh a, kan tir-kawi nasa ngang mai a tih theih hial awm e.

Tin, khawvela milian leh miropuite chuan, anmahni Thlangtlingtute, Chawmseiliantute, Duhsaktute leh Țantute tih-beidawn châng an ngah mai. Anmahni dik loh vang emaw, midang (mipui)-te thiam loh vang emaw chu a ni ngei ang. Chutihlaiin, Lal Isua erawhchuan, Amah Sâwmtute leh Amah Beiseitute a tihbeidawn thu emaw, a tih-hlawhchham thu emaw sawi tur leh hriat tur a awm hauh lo thung!!! Min Țanpui leh min Chawisân sauh sauh duhin, “In thinlung mangang suh se; Pathian in ring e, kei pawh mi ring ve rawh u. Ka Pa inah awmna tam tak a awm a, a awm loh chuan ka hrilh tawh tur che u a ni; in tân hmun siamin ka kal dawn hi. Tin, in tân hmun ka han siam chuan ka lo kir leh ang a, ka hnenah ka la ang che u; ka awmnaah nangni pawh in awm theih nân,” tiin min chah zui lawm lawm a ni (John 14:1-3)

Fakna Hla chuan, Lal Isua danglam bik zia leh ropui bik zia chiang deuhvin hetiang hian a sawi a, “Kan Isua ang ţhian dang rêng an awm lo. Kan sual ngaidam thei mi dang an awm lo. Amah tluka inngaitlâwm an awm lo. Kan hnêna awm loh châng ni a awm em? Min thlamuan theih loh zân i hre ngai em? Chu Țhian ţha chuan mi a thlâhthlam ngai em? Mi sual a hnarte pawh i hre ngai em? Chu Chhandamtu ang chu mi an awm em? A chhandam zawh loh mite an awm em?” tiin (KHB 134).

2.3. KAN HNÊNA AWM TURIN LAL ISUA I SÂWM VE ANG U
Bible-a kan hmuh angin, Emau kawnga kal mêk Zirtirte khân hrechiang lovin Lal Isua kha an hnena riak a, châm ve turin an lo sâwm a, an va ti-fuh tak êm!!! (Luka 24:13-32, Marka 16:12-13). Liandova-te unauvin, mite duhloh rethei leh hri ţha lo vei emaw kan mikhual an tih laia Lal hausa leh thiltithei Lersia an lo mikhual reng ang khân, Lal Isua sâwmna châng hre lova hnar ta te, mikhual pangngai emaw ka thlen an tih laia Lal Isua lo thleng ta si te hi Zoramah hian chhungkaw engzât tak awm ang i maw???

Zoram hian harsatna lian tak tak leh boruak mak tak tak a hmachhawnin, a tawng chho mêk a, a tawng zel dawn. Kan Ram leh hnam dinchhuahna turah te, kan chhungkaw harsatnaah te, mimal harsatnaah te, eirûk chungchangah leh, zu leh damdawi hmansual leh hmeichhiat-mipatna hmansual chungchangah te hian, kan buaina leh harsatna min sutkian-sak tura Lal Isua sâwmna châng kan hria em le? Țawngkam-a sâwm satliah mai mai a ni lo. I Thinlung chhungril ber aţangin Lal Isua hi i sâwm tak tak em? tih hi a pawimawh. Hei hian kan nun-a Lal tur leh Thu nei tura sâwmna te, mahni taksa ngeia Pathian tâna inhlan-zuina thlengin a huam a ni (cf. Rom 12:1-3).

Mizo Bible-a inziak, “KÂ-IN AN CHELH A, KAN HNÊNAH AWM TA CHE; KHUA A TLAI DÂWN TA A, NI PAWH A TLÂK DÂWN TAWH HI” tih-a “KÂ-IN AN CHELH A” tih lai tak hi Mizo-ţawnga a inziak dân ang hi chuan a sawitum a phawk zo lovin, a pâwn-lâng lutuk hretin alang (Luka 24:29). A ţawngbul lamah chuan, Greek “parebiasanto” hman a ni a. English-ah pawh, “they urge him strongly” or “constrained” tia dah a ni. A ţawngbul chuan, “thupe-a tilui, nasa taka thlêm leh taksa ngeia tir-lui, etc.” (compel, oblige, force physically, pressurize, persuade, push, provoke, insist, persist, etc.) tih te a huam a ni. Kan sawi tum ber chu, “EMAU KAWNGA KAL MÊK ZIRTIRTE, LAL ISUA SÂWMTUTE KHÂN ŢAWNGKAM ŢHA SATLIAH MAI MAI NI LOVIN, TIH TAKZETIN, NASA TAKIN AN HNÊNA AWM TUR HIAN AN NGEN CHIAM A NI,” tih hi a ni.

I mimal harsatnaah te, in Chhungkaw harsatnaah te, i fate chungchanga i harsatnaah te, i nupui/pasal chungchanga i harsatnaah te khân, Lal Isua hnênah tihtakzetin, nasa taka ngen-in i thlen tawh em? Lal Isua hi i harsatna sut-kian pui tur che leh, i lungngaihna chhâwk tur che-in i sawm tawh em? tih hi lo in-zawt ang che. JAKOBA ANGA, “MAL MIN SAWM LOH CHUAN KA THLÂH LOVANG CHE” TIA, NGENNGAWL TAKA, TIHTAKZETA PATHIAN I DAWR CHUNG PAWH-A CHHANNA I HMU LO FO A NIH CHUAN, AMAH PATHIAN NGEI CHU I DEM DAWN NIA (Gen.32:26). Thinlung keh-chhiaa tihtakzeta Lalpa au-tu hnênah Pathianin a khawngaihna hmêl a thup ngai lo, “KA HMING PU KA MITE CHUAN INNGAITLÂWMA AN ŢAWNGŢAI A, MIN ZAWN A, AN AWM DÂN SUALTE AN HAWISAN CHUAN, VÂN AŢANGIN KA LO NGAITHLA ANG A, AN SUALTE KA NGAIDAM ANG A, AN RAM CHU KA TIDAM LEH ANG” tia Pathian Inpuanna leh Thutiam ropui tak hi ala ding reng a ni (2Chro.7:14).

3. THU TLÂNGKAWMNA
Khawvel hian changkân lam a pan zel ang a, mihringte pawh kan changkâng chho zel ang. Ram leh hnam inkaihhruaina dân leh administration te pawh a ţha tulh tulh ang. Amaherawhchu, KHAWVEL HI SETANA THUHNUAIA AWM A NIH TLAT AVANGIN, KHAWVEL CHANGKÂNG ZELAH HIAN SUALNA PAWH A CHANGKÂNG VE ZEL ANG. Țawngkam mawi lo ni suh sela, “KAN SUAL DÂN A CHANGKÂNG TULH TULH ANG A, KAN BUAI DÂN A CHANGKÂNG TULH TULH ANG A, KAN THIH DÂN PAWH A CHANGKÂNG TULH TULH BAWK ANG” tih hi kan hriat rêng a ţul. Bible-in a lo sawi lâwk tawh angin, Ringtute pawhin rinna leh thlarau lam thil hi kan hlamchhiah chho tial tial dawn a, kan thlarau nun leh rawngbawlna te pawh a sâng lam ai chuan, a hniam tulh tulh dawn a ni (2Tim.3:1-9, 2Pet.3:1-18, 1John 2:15-17). He Thudik hi Khawvela Church/Mission History aţangin a lang chiang hle.

Rawngbawlna kan thlir dân dal tawh zia hi kan hre thei mai awm e. KUM 100 CHU SAWI LOH, KUM 50 VÊL KAL TÂA PASTOR-TE KAN THLIR DÂN LEH KAN HMUH DÂN TE, AN INPÊKNA (COMMITMENT)-TE KHA NGAIHTUAH LET ILA, VAWIIN-A KAN HUN HMAN MÊK NÊN-A KHAIKHIN CHUAN INTHLAU TAK A NI. SORKAR HNA A VÂNG TIAL TIAL A, HLAWH TLÊM-TEA, RETHEIH THLANGA LAL ISUA ZUI A, HUN PUMA HARSA TAKA RAWNGBAWLNAA INHMAN RAL VEK CHU… CHONA LIAN TAK A NI TA!!! ZORAM, “KRISTIAN 100%” TIA INCHHÂL RAMAH PAWH HIAN, MAHNI HREHAWM PAWISA LOVA NITIN-A KRAWS PU-A LAL ISUA HNUNGZUI TUM CHU MI-Â NIH AN HLAWH TA NIIN ALANG!!! Dema anga Rawngbawlna tlâwm santute pawhin, inthlahrung hauh lovin mahni duhzawng Bible châng kan fawm-khâwm a, mahni nungchang milh-in Bible kan hrilhfiah ţan ta a nih hi!!! Zoram Ringtute hian kan nun-a Lal turin Lal Isua kan sâwm nawn mawlh mawlh hi ava ţul tehlul êm!!!

Hetiang hun harsa leh thim kan tawn chhoh mêk lai hian, Kohhran-ah Thlarau Thianghlim pâwlna leh chakna leh ei tûr i hmu tlêm ţan a nih chuan, in chhungkua tal kha ngaihtuah ang che. I chhungkua tal vêng la, humhim tum ang che. Chhungkaw kima Chhandamna Lawnga in lawi vek theih kha a pawimawh ber!! Israel mipuiten, “David, i chhungkua ngaihtuah mai rawh” an tih ang khân, Nangmah leh i Chhungkua vêng him turin, Sâwmtute hnar ngai lo Lal Isua hi thinlung chhungril ber aţangin… “KAN HNÊNAH AWM TA CHE” tiin i sâwm ve ang u.

(((He Article hi April 5, 2015, Easter Sunday-a Saiha Kohhran-a Hun Ruat ka nih anga Sawi Tura Ka Inbuatsaih vek tawh, Mahse, ka Zin chhuah tâk avanga ka Sawi hman tâk loh a ni a. Tlai khaw hnu-ah ka rawn “Tlailam Umpâwng Pâr” veleh hnuhnawh a ni e)))

May 2015, Mizo(ram) Diary

1st. Friday: India ram pumah petrol man litre khatah Rs. 3.96/- leh diesel litre khatah Rs. 2.37/- a tih san a ni.

2nd. Saturday: Champhai district-a Kelkang khuaa Lalrinenga in, Assam type chu bungrua chuh hman lohin a kâng ral a, mihring thi leh hliam an awm lo. Thu dawn danin, kangmei hi Lalrinenga te chhungkua leh an mikhualte awm loh hlana chhuak a ni a, an chhungkua leh an mikhual mi pangate bungrua zawng zawng a kâng ral a ni.

3rd. Sunday: Nagaland-a hel pawl, National Socialist Council of Nagalim – Khaplang (NSCN-K) pawlte’n Nagaland Mon district-a Changlangsu khaw bula Assam Rifles an lambunnaa AR mi pariat thite zingah Jerusalemthara (29) s/o Lalringliana, Vanbawng a tel. Jerusalemthara hi kum 2005-ah Assam Rifles-ah a lut a; a nupui Lalthannguri nen fapa pathum an nei a, a nupui fanaute hi Vairengte-ah an awm mek a ni.

4th. Monday: Mizoram University-a Library and Information Science Department Alumni Association chuan Aizawla I&PR Auditorium-ah Mizorama library tih changtlun zelna tura hmachhawp zirhona leh sawihona an buatsaih. Workshop-ah hian MZU Library Science-a HoD Prof. RK Ngurtinkhuma, Pachhunga University College assistant librarian Dr Lalthanmawii Sailo leh MZU Central Libary-a professional assistant Dr C.Lawmzuala te paper buatsaih an zirho a ni.

5th. Tuesday: UNODC, World Vision leh Mizoram University Students Council ṭangkawp chuan MZU conference hall-ah ‘One day sensitization programme for young people in Mizoram’ tih thupui sawihona hun an hmang a, MZU vice chancellor Prof. R.Lalthantluanga’n a hmanpui. Sawihonaah hian mithiamte’n damdawi hman sual chungchang an sawi a ni.

6th. Wednesday: MPL club zinga Aizawl FC chuan I League second division khelh mekah Golaghat-ah Aizawl FC-in Siliguri-a an hneh loh Chanmari FC chu 4-2 in an hneh a, an hnuai chiaha awm Lonestar Kashmir FC-in table hnuai lama awm Kenkre 1-1 a an draw bawk avangin MPL3 champion hi I League second division-ah point 31 hmu tawhin khelh khat la awm mahse Lonestar Kashmir FC-in point 27 chauh an la hmuh avangin an champion ta. I League second division champion team ten I League an khelh theih dawn avangin season thara I League khel turin an tling.

7th. Thursday: AIDS natna avanga thi, nu leh pate fa, fahrah ni ta te pual ni, World AIDS Orphans Day a ni a, he ni pual hian Shalom chuan EFICOR leh TEAR Australia te nena tang rualin Aizawla Millennium Centre-ah inkhawm an buatsaih. He inkhawmah hian MSACS Project Director, Dr. Lalmalsawmi Sailo chuan, Kohhran leh khawtlang tanrualna a that phawt chuan, Mizoramah hian he natna leh a veite buaipui kawngah thui tak kal theih a nih a beisei thu a sawi.

8th. Friday: MBSE hnuaia kumina Higher Secondary School Leaving Certificate Exam result a chhuak a; za zela 74.53 an pass. An dinhmun chu distinction-ah 151, 1st Division-ah 1,468, 2nd Division-ah 2,452, 3rd Division-ah 3,512 a ni.

9th. Saturday: Champhai Kanan Veng Congress unit-te chuan April 30, 2015-a V/C inthlan neih zawh taka returning officer (RO) thil tih dana lungawi lohna lantirna atan kawng an zawh. An lungawi loh chhan nia lang chu Champhai Kanan Vengah hian V/C seat pasarih a awm a, RO-in INC pali leh MNF pathum tlinga a puan hnuah, ballot paper chhiar ṭhat leh a ni a, MNF pali leh Congress pathum tlinga puan an nih vang a nia; “Result hi kan pawm thei lo,” an ti.

10th. Sunday: Salvation Army corps hrang hrangte chuan Mother’s Day an hmang. Mother’s Day-ah hian nute hlutzia leh pawimawhnate an inzirtir a, naupangte’n an nute hnenah thilpek an hlan bawk.

11th. Monday: Saiha Maubawka tlangval pahnih – Lalchamliana (22) s/o Zohminga leh Vabeiriapha (19) s/o Chhualai te chu Kawlchaw bul Chhimtuipui luiah chesualin an tla hlum. Lalchamliana hi tuiah a tla a, Beiriapha’n chhan a tumna lamah an pahnihin an tla dun ta a ni.

12th. Tuesday: International Nurses Day a ni a, Mizoram hmun hrang hrangah nurse-te’n an hmang a; thupui chu ‘Nurses: A force for change: Care effective, cost effective’ tih a ni. International Nurses Day-ah hian India President chuan India rama nurse hna thawk ṭha thlan chhuahte hnenah Florence Nightingale Award a hlan ṭhin a, kumin International Nurses Day-ah hian Vanhnuaithangi, Kulikawn chuan Florence Nightingale Award a dawng.

13th. Wednesday: Lalmohan (34), Mualṭhuam, Mamit district chu a nupui, Koriti (24)-in an fehnaah a sât hlum. Lalmohan te nupa hi loah an feh dun a, a nupui chu tlaiah amah chauha a haw avangin, an ṭhenawmte’n a pasal awmna an zawt a, thlámah a sah hlum thu a sawi a ni. Koriti hi police-in an man nghal.

14th. Thursday: Lawngtlaia AH&Vety department chuan NLUP second phase hnuaiah vawk vulh thlangtu chhungkua 186 hnenah vawkte pali ṭheuh, a vaiin vawkte 744 leh a chaw man tur Rs. 34,950/- ṭheuh an sem. Sum sem zawng zawng hi Rs. 65,00,700/- a ni. Heti hian NLUP seond phase-a vawk vulh thlangtu chhungkua 977 zinga chhungkua 849 hnenah ṭanpuina sem zawh tawh a ni a, chhungkua 128 hnenah June 2015 chhunga sem leh tum a ni.

15th. Friday: UPC (North East India) general headquarters office thar chu UPC general superintendent Rev. VL Dika Sailo-in Pathian hnenah hlanin a hawng. UPC Office hawnna inkhawm hi office awmna bialtu MLA Lt.Col. ZS Zuala leh AMC chairman CT Zakhuma ten an hmanpui a; tlaiah office thar lawmna ruai an ṭheh nghal.

16th. Saturday: Leitan Bial KṬP-te Leitan Kohhran hall-ah blood donation camp an huaihawt a; Synod Hospital tan thisen unit 63 an pe a, a petute mipa 55 leh hmeichhia pariat an ni.

17th. Sunday: North East India Christian Council Youth Assembly (NEICCYA) Biennial Assembly vawi 16-na, May 15, 2015 zana Aizawl Temple Corps biak ina ṭan chu a ṭiak. NEICCYA Assembly-ah hian hruaitu tur an thlang. President-ah Rev. Eleazer Sanglyne (KJP Synod) chu thlan a ni. NEICCYA hi NEICC hnuaia ṭhalai pawlte intawhkhawmna a ni a; India hmarchhak biala kohhran pawl 35 leh para-church pakua an tel. Tun ṭum Assembly-ah hian Manipur, Meghalaya, Assam, Nagaland leh Mizoram aṭangin palai 408 an kal a ni.

18th. Monday: International Museum Day a ni a, he ni pual hian Mizoram State Museum chu mipui tan man chawi loa tlawh theiha hawn a ni. Inter-National Council of Museum (ICOM) chuan May 18 hi kum 1977 khan International Museum Day atan a puang a, Mizoramah chuan kum 2005 aṭang khan hman ṭan a ni. Tun dinhmunah Mizoram State Museum-ah hian gallery paruk – Zoology, History & Mineral, Anthropology, Ethnology, Textile leh Archaeology-te a awm a; thil (object) 933 phochhuah niin, reserved collection-ah object 2,824 dahṭhat a ni.

19th. Tuesday: Chief Minister Lal Thanhawla pian champha a ni a; Haryana Niwas, Chandigarh-a Swatchh Bharat Mission Sub-Group meeting a telnaah state dang chief minister leh minister dangte’n lawmpuina an hlan. Lal Thanhawla hi May 19, 1938-ah a piang a ni.

20th. Wednesday: Samaritan Association for the Blind enkawl Special Blind School, Durtlang chuan an sikul atanga kumina HSLC pass te lawmpuina hun an hmang a, Pu Lal Thanzara, Health & Family Welfare Minister chu khuallian a ni. Special Blind School hi May ni 1, 2001 khan din a niin pawl 1 atanga pawl 10 thleng a awm a, tunah hian zirlai 30 an awm a ni. HSLC hi vawi 9 exam tawhin vawi 6 chu 100% an lo pass tawh a ni. Kumin hian zirlai pahnih HSLC exam te chu an passed ve ve a ni.

21st. Thursday: India ram hmun dangte rualin Mizoram sorkar hnuaia department hrang hrang ten Anti Terrorism Day an hmang. He ni hi Prime Minster hlui Rajiv Gandhi thih ni champhaphak denchhenin kum tin hman thin a ni.

22nd. Friday: Pachhunga University College-a assistant professor H Laldinmawia lehkhabu ziah ‘Literature Lamtluang’ tih chu minister Zodintluanga’n I&PR Auditorium-ah a tlangzarh. Lehkhabu hi Rs. 300/- man a ni.

23rd. Saturday: Lunglei District Anti-Tobacco Squad, Food Safety Authority leh Custom department-te ṭangkawp chuan Lunglei khawpuiah dan loa vailho leh a kaihhnawih zuar leh ei tur him tâwk lote dapchhuah beihpui an thlak a; COTPA leh Food Safety & Standard Act bawhchhiaa zawrh meizial leh Gutkha product eng emaw zat an man a, a neitu mi pali an man bawk.

24th. Sunday: Jerry Ngurthansanga (23), Mamit Field Veng chuan J Chawnghmingthanga te in rawk tumin a luhchilh a, ina awm Chawnghmingthanga fanu kut a thlak. Hei vang hian Jerry Ngurnunsanga hi police-te’n an man nghal.

25th. Monday: Aizawl khawpuia Closed Circuit Television (CCTV) vuah thar leh Aizawl SP Office-a CCTV Control Room thar chu Home minister R.Lalzirliana’n a hawng. A thawh khatna atan cheng nuai 395.5 hmangin Aizawl khawpui hmun 10-ah CCTV camera vuah a ni tawh a, hmun 23 dangah vuah leh tur a ni. CCTV Control Room chu Aizawl SP Office-ah chiah dah a la ni a, police station dangah pawh la dah tum a ni.

26th. Tuesday: Mizoram Governor thar Lt.Gen. Nirbhay Sharma (69) chu Raj Bhavan Durbar Hall-ah Gauhati High Court judge T.Vaiphei chuan rinawmna tuh tiamtirin a la lut. Mizoram state a nih hnua Larsap 17-na a ni. Lt.Gen. Nirbhay Sharma hi kum 1946-ah Uttar Pradesh khawpui Lucknow-ah a piang a, National Defence Academy-a a zir chhuah hnuah kum 1966-ah Indian Army a zawm a; sipai chawimawina PVSM, UYSM, AVSM leh VSM-te a dawng hman. Thiamna lamah M.Sc, M.Phil (Defence Studies) a ni.

27th. Wednesday: Power & Electricity department-a electrical worker (jugali) Lianrema (46), Mamit Chhimveng chu Mamit tui lakna electric 11KV line-in a man a, ká chhawn lohin a thi

28th. Thursday: Lai Autonomous District Council-a MDC leh opposition leader ni lai, B Lalduhsaka (56) chu thawhah avangin a thi. B.Lalduhsaka hi kum 2002, 2005 leh 2010-a LADC inthlanah MNF ticket-in Chawngte P bial aṭanga thlan tlin a ni.

29th. Friday: Sorkar laipuiin naupang huaisen chawimawina, Jeevan Raksha Padak a pek chu Mamit district-a a dawngtute hnenah Mamit DC Vanlalngaihsaka’n DC conference hall-ah a hlan. Chawimawina dawngtute chu – Malsawmtluangi leh Hani Ngurdinthari, Lengte khua ve ve an ni. Award hian chawimawina thuchei, medal leh Rs. 40,000/- a keng a ni.

30th. Saturday: Lawngtlai district-a Sihtlangpui khaw naupang pathum chu Chhimtuipui luiah an tla a, an zinga pahnih an thi a, pakhat chu dama chhanchhuah a ni. Naupang pathumte hi chengkawl khawrh turin Chhimtuipuiah an kal a, lui dài kai an tum laiin tuiin a la ta a ni. Elvis-a s/o Chhimthangvela chu chhanchhuah hman a ni a; Elvis-a unaunu, Khawpuimawii leh Ramthianghlima d/o Lalngeni te erawh chu chhan hman lohin an tla hlum a ni.

31st. Sunday: Lungleia District Education Office (DEO) gate bulah bomb a puak a, bomb hian darthlalang eng emaw zat leh bang ṭhenkhat a tichhia.

1. THU KAMKEUNA
Kan Tisa leh Thlarau lam Nun atân hian Lalpa min ruatsak, Lalpa inpuanna, Lalpa min pek ngei hi a awm a ni tih kan chiang ţheuhva. Tunlaia Kêlkânga Thlarau Thianghlim Hnathawh ropui tak pawh hi chung zinga pakhat chu a ni. Tuna Kêlkâng Harhna kal mêk hi June 13, 2013 aţanga inţan tawh nia sawi a ni a. Vawiin thlengin Chhimtu an pung tual tual a, Pathian Hnathawh a zual tulh tulh emaw tih tur a ni. Kêlkânga Harhna thleng chungchâng hi Mipui vântlâng hnuailam aţanga Sakhaw hruaitu mi pawimawh tak tak kâ aţangin, țawngkam leh ziakin, Fakna leh Selna, Fak-mawitu leh Sawi-hnawmtu hmuh tur leh hriattur an awm reng a. Kei pawhin, Kêlkâng Harhna Chanchin ka hriat tirh aţanga ka rilru-a Pathian thu rawn awm leh vawiin thlenga châm reng mai sawichhuah ve tawh ţha-in ka hria a. Pathian Thlarauvin min pâwlna leh min kawhhmuhna kaltlanga Pathian Thu ka zirna aţangin ka rawn sawi dawn a. Chhiartuten rilru-a Țawngţaina nen-a in ngaihtuah-zui ngei ka ngen che u a ni.

2. TUNLAI ZORAM TÎTÎ – KÊLKÂNGA PATHIAN HNATHAWH ROPUI!!!
Tunlaia Kêlkânga Pathian Thlarau Thianghlim Hnathawh hi ava ropui êm!!! Pathian Hnathawh mak zia leh ropui zia hi sawiin a siak lo ve. Bible-in Kohhran/Ringtute Awmdân tur (Model Church) a sawi tam tak kha Kêlkângah hian a thleng dik mêk a ni, “Tin, Tirhkohte zirtirin, inpâwlin, chhang phelin, ţawngţaiin ţhahnemngai takin an awm reng a. Tin, mi tinin an hlau ta a; Tirhkohte chuan thilmak leh chhinchhiahna tam tak an ti a. Tin, a ring apiang chuan engkim an inţawm hlawm a, an ro te, an sum (THIL NEIH)-te an hralh a, an châkkhai daih lek ţheuhvin an zaa hnenah chuan an sem ţhin a. Tin, ni tin rilru hmun khatin Pathian biak inah chuan ţhahnemngai takin an awm ţhin a, an in lamahte pawh chhang an phel a, hlim tak leh lungawi takin an chaw an ei ţhin a, Pathian an fak a, mi zawng zawng lawmzawngin an awm ţhin. Tin, a chhandam mêk apiangte chu Lalpain ni tin an hnenah a teltir zel ţhin” tih kha a takin kawng tam takin a thleng dik a ni (Tirh.2:42-47).

(1). Kohhran PAWL ram indaidanna a ţhiat vek. PATHIAN CHIAH AN DAH LAL BER. (2). Speaker ram a ţhiat vek. SPEAKER NGAIHSȂN BIK TUR AN AWM LOVA. PATHIAN CHU SPEAKER A NI. (3). Pathian Hmanrua a Tlâwm Hle. LEI-TLANG LEH MAHNI-A ȚAWNGȚAIA PATHIAN DAWR A NI TAWP. (4). Kêlkâng Khua-te Inpêkna ropui-zia sawiin a siak lo. Mikhual ringawt an buaipui a, mahni mimal Hna an chawlhsan vek a, Thawhlawm lah a bîk takin an khawn chuang si lo!! June 2013 aţangin Zân tin an Inkhawm a, an Thiltih leh an Inpêkna hian THLARAU THIANGHLIM CHU HNA THAWK LO THEI LOVIN A SIAM A NI.

(5). Taksa leh Thlarau Damna mamawh tam takin Damna an chang a. Mimal, Chhungkua leh Kohhran hrang hrang aţanga kal, Taksa leh Thlarauva damna chang, hlim haw an tam hle. Hei hian an awmna Kohhran-ah Thlarauva harhna leh hlimna a thlen zel a. Zoram Kohhran hrang hrangah, Mimal, Chhungkua, Khawtlang leh Kohhran-ah pawh a Țha zawngin nghawng a nei chho mêk a ni. (6). Aizawla Kohhran tam tak chu Zân tin deuhthaw-in an zaikhawm a, Thla 3 Zaikhawm tawh te, Thla 1 aia tlêm lo Zaikhawm tawh-te an ni tlângpui. Hetiang khawpa an Zaikhawm rei a nih chuan, ZAIHRUAITUTE inpêkna a ropui hle tih hi sawi tel hrâm a ţul ka ti.

2.1. LALPA’N TLÂNG A RUATSAKAH CHUAN AN KAL TA A
Matt.28:16-20-ah chuan, “Tin, Zirtirte chu… Lalpa’n Tlâng a ruatsakah chuan an kal ta a” tih kan hmu a. Vâna a lawn dawn khân, Lal Isua’n Tlâng a ruat bikah ngei chuan Apostolte (Zirtirte) kha kal turin a hrilh a. Apostolte khân, Lal Isua, Lei leh Vân Lal hnên aţanga Thupek & Thiltihtheihna an dawng duh a nih chuan, Lal Isua’n kal tura a tihna hmun – Lalpa Tlâng Ruatah ngei hian an kal a ngai a ni.

Mimal, Chhungkua & Pawl (Kohhran)-ah hian, Pathian Thiltih, Kan Nun/Rawngbawlna/Hnathawh tur hi LALPAN A RUATNA HUN LEH HMUN A AWM VEK. A Hmun hlat zawng te, a nghah chhung a rei leh sei emaw, a Thawh hun chhung a tawi leh sei chu a in-ang lovang. A PAWIMAWH BER CHU LALPA TLÂNG RUAT A AWM A, CHU CHU HRIAT A, PAN A, KAL A, THLEN NGEI NGEI A NGAI, TIH HI A NI.

1Lalte 19:1-18 kan chhiar chuan, Zawlnei Elija chu Lalnu Jezebeli Hlauvin a tlânchhia a, Pûkah a birû a. Mahse, Pathianin, “TLÂNGAH SAWN LALPA HMAAH VA DING RAWH…” (19:11) tiin a ko chhuak leh ngat a nih kha. Pûk chhunga a bihrûkna hmunah khân Pathianin a be thei reng a, Mahse, a be nghal mai lo tih kan hria. Zawlnei Elija hi Pathianin a biak theih nân leh Pathian Aw a hriat theih nân, PATHIANIN A RUATNA HMUNAH, TLȂNGAH NGEI DING TURIN PATHIANIN A KO CHHUAK A. PATHIANIN A RUAT HMUN KHER KHA ELIJA’N A PAN A NGAI A NI.

Zawlei Elija hnena Pathian Inpuanchhuahnaah hian Thil Chhinchhiah tlâk tak leh kan Zir tur pawimawh tak mai a awm. Elija hnena Pathian a rawn inlâr hma hian, THLIPUI, LIRNGHING LEH MEI ALH nasa tak leh râpthlâk tak a lo thleng hmasa phawt a. Mahse, heng Thawm ri bêngchheng leh thawm hlauhawm leh chhiatna râpthlâk takah hian “LALPA A AWM LO” tiin a inziak a ni. Helai Bible châng sawi tum hi kan chian a ngai khawp mai. Heng Thlipui te, Lirnghing te leh Mei alh te hi LALPA THILTIHTHEIHNA LEH LALPA CHÊTNA VEK A NI. MAHSE, PATHIAN INPUANCHUAHNA TAK TAK A TLING LO, A HMANRUA MAI AN NI.

Zawlnei Elija hnena Pathian inpuanna tak tak chu Thlipui, Lirnghing leh Mei alh reh hnu-a, reh ţhiap, engkim a reh vek hnu-ah, beidawn tawpah, a tawp-khâwkah Pathian a rawn ţawng a, Elija’n Pathian Aw a hre ta chauh a ni. 1Lalte 19:12, “Aw dam diai hi a lo chhuak a… Hetah hian engnge i tih Elija?” tiin.

Sam 46:10-ah chuan, Kora Fapate Fakna Hla, “NGAWI ULA, PATHIAN KA NI TIH HRE RAWH U” (Be Still & Know That I Am God) tih kan hmu a. Hei hian, Mahni (mihring) lam kan ţawng tam lutuk te, kan chêt tam lutuk te, thawm kan ngah lutuk te, kan lansâr lutuk te hian Pathian Aw hriat a harsat thu a sawi a. Mihring lam thiltih reh hmak, ngawih hmak a, Thinlung zawng zawnga Pathian Aw kan Ngaihthlâk a, kan Zawn a, kan Duh tak tak a, kan Châk tak tak Hnu-ah chauh Pathian Aw leh inpuanna hi a hriat theih chauh ţhin tih a rawn tichiang a ni. Hei hi a takin Kelkângah a thleng mêk.

Kêlkâng Harhna Chhimtu Tumahin, Speaker Thusawi a ţhat êm avang te, Counselor-te Pathian Thusawi a fiah êm avang te-a Pathian khawngaihna an chan thu an sawi hriat tur a awm lo. Chutih ahnêkin, Kêlkâng Harhna Chhimtu reng rengin, MAHNI LEH PATHIAN INKAR CHAUH A PAWIMAWH-ZIA LEH A ȚUL ZIA HLIR HAHÎP-IN AN SAWI A NI. Speaker/Counselor Thiam & Țha lam a ni tawh lo. MAHNI LEH PATHIAN INKȂR A FEL LEH FEL LOVAH A INNGHAT A. PATHIAN AW HRE TUR LEH NGAITHLA TURIN MAHNI LAM INPÊK PUMHLUM A NGAI A NI.

Zawlnei Elija kha, TIH-TUR PAWIMAWH (MISSION THAR) A PÊK DAWN AVANGIN, TIBUAITU EMAW, CHHUANLAM TUR LEH SAWI VE TUR DANG AN AWM VE PATHIANIN REM A TI LO. Fakna Hla Siamtu chuan, “Awm zawng zawng an ral hunah pawh, Awma ka ta a ni” a lo ti a. Min Tihnawktute, Min Tibuaitute, Min Dâltute, Chhuan tur te, Chhuanlam tur te, Sawi tur kan neih zawng zawng-te hi an tawp a, an ngawih ţhap a, an reh ţhiap hnuah, Pathian a lo lang chauh ang. Ringtute hian Lal Isua kan Țawng khalh a, kan Tih-khalh a, kan Ropui khalh vek ţhin. A Lâng tur zawk hi kan lo Tlatlum zawk a, a Tlatlum tur hi a Lâng zawk ţhin, “ROPUIA A LAN HUN A PIANGAH ROPUIIN KAN LANG VE ANG” tih hi a pawimawh lai ber chu a ni. Chuvangin, “Min Tihnawk apiang leh Sual keimahnia bet tlat chu i dah ve ang u…” tih hi a THUNAWN atân kan sak fo a ţul (Heb.12:1-2).

2.2. HE TLÂNGAH HIAN IN AWM REI TÂWK TAWH E
Deut.6:1-8-ah chuan, Israel fate Horeb (Sinai) tlânga an awm chu Pathianin, a tirchhuak ta a, “He Tlânga hian in awm rei tâwk tawh e, kal chhuak tawh rawh u” tiin, a tir chhuak ta a ni. Sinai tlâng hi Mosia’n Pathian hnên aţanga Thuthlung a lâkna a nih avangin Israel faten an ngaisângin, an ngaina a, an ngaihlu êm êm a ni. Chuvangin, Pathian pawhin an rilru hria-in, Israel fate hi he Horeb Tlângah hian rei tak a awm tir a, an awm rei thawkhat viau niin a lang.

Mahse, Horeb Tlângah hian an awm kumkhua thei dawn lo tih Pathianin a hria a. Tih tur pawimawh lutuk mai, ram lâk tur an nei a, chawl hman an ni lova, muang châng thei pawh an ni lo tih a hria a ni. Helai thu hian, Pathianin a Hmanrua a thlâk fo ţhin tih a rawn nemnghet nghal bawk. Thil awm tawh chauh hmanruaah a hmang lova, Thil awm lo-te nên lama hmanruaa hmang theitu Pathian a ni tlat avangin, an Hmuh ngai loh ram leh hnamte chu hneh tura an pan a, an kal a ngai a ni (1Kor.1:25-31).

Zoram pawh hi thlir ila, Speaker Ropui tak tak & Camping ropui tak tak-te a reh țan tawh. Hei hi Speaker leh Camping ţhat loh vang a ni lo. El-Bethel vâng lai te kha Pathian hnathawh ava ropui êm!! Mahse, khatiang ang te kha a thleng leh tawh lo. A Khua-khuaa, Kohhran tih-bik awm lova Camp nuaih nuaih te kha a awm tawh lo. El-Bethel rah-chhuak te kha duhawmin ţha hle mahse, Lalpa’n Hmanrua atâna a hman hun a tawp tlat tawh!!! Hmanraw dang a nei leh tawh a ni. Chutihlai erawhchuan, he Lalpa Hmanrua Kêlkâng Harhna hi heti reng hian a awm dawn lo, a Petu Lalpa ngeiin a Hmanrua a thlâk hun ala awm dawn a, “KÊLKÂNGAH HIAN IN AWM REI TAWK TAWH E, KAL CHHUAK TAWH RAWH U” a tih hun hi ala thleng dawn a ni.

An sawi dânah chuan, Kelkâng Harhna hi June 2013 aţanga inţan tawh a ni a. Eng chen nge ni ang?? tih chu Lalpa thu a ni. Deut.6:1-8-a kan hmuh angin, Israel fate HOREB (SINAI) TLÂNGA REI TAK AN AWM CHHAN CHU- RAL DO TUR LEH RAM LA TURA AN INBUATSAIHNA A NI. Mosia kaltlanga Pathianin Kalchhuak tura Thu a pek 12-te hi a chiang khawp mai – (1). Kal chhuak ula, (2). Amor ho tlâng ramah leh a chhehvel zawng zawngah, (3). Araba-ah, (4).Tlâng ramah, (5). Phai ramah, (6).Chhim ramah, (7).Kanan hote awmna Tuifinriat kamah,( 8). Lebanonah, (9).Luipui Euphrates lui thlengin, (10). Ram chu ka pe Tawh Diam a che u, (11). RAM CHU VA LUAH ROH U, tiin.

HOREB (SINAI) TLÂNG PIAHAH HIAN PRACTICAL, ACTION, A TIH-A TIH NGAI, PIAH LAM RAM RAWNGBAWLNA PAWIMAWH TAK A AWM A. HNEH ZEL TUR LEH PATHIAN THUPEK HLENCHHUAK TURA ISRAEL FATE KHA AN KALCHHUAH A NGAI A NI.

Pathian faka hlim, lawm & lâm hi ava nuam êm!!! A țha lutuk, tih zel tur a ni a, tih theih ngei pawh tum tur. Kohhran hi hetiang hi ni reng mai se, ava nuam dawn êm!! Kêlkȃng Harhna pawh hi miten Tisa & Thlarauva damna an chang zel ang hian, hetiang hi ni reng mai mai se… tih chu duhthusam a ni. Thlarau Thianghlim chêtna hmun leh a zalenna hmun leh a Thiltihtheihna a awmna hmun chu a nuam a ni!! Kalsan leh Chhuahsan hi a huphurhawm ngawih ngawih. Hmêldanglamna Tlângah, Tirhkoh Petera pawh khân, “Lalpa, kan tân heta awm hi a ţha. I duh chuan hetah hian bâwkte pathum ka khawh ang; i tân pakhat, Mosia tân pakhat, Elija tân pakhat” tiin rawtna a lo siam hial a nih kha (Mat.17:4).

MAHSE, HEI HI KAN HRIAT RENG A ȚUL. A CHUNGA PATHIAN THUPÊK AŢANGA LANG CHIANG ÊM ÊM CHU, HLIM/LAWM/LÂM/KÊLKÂNG HARHNA HI SETANA RAL DO TURA RAMRI-A KAN INBUATSAIHNA A NI. HLIMNA/LAWM/LÂM/KÊLKÂNG HARHNA PIAHAH HIAN RALDO KAN ȚAN DAWN CHAUH A NI. LÂM-TUAL/HLIMNA HMUN-AH TRAINING, RÂLTHUAM, CHAKNA (EI ȚHA ȚHA) KAN LA MÊK A NI. LÂM-TUAL/HLIMNA PIAH-AH (PIAH LAM RAMAH), MAHNI INHNEH ZEL LEH SETANA BEIH A, HNEH ZEL A NGAI DAWN A NI.

2.3. HE TLÂNGAH KHER LO PAWH…
Samari Hmeichhia nena an inbiaknaah Amah Lal Isua ngeiin a sawichhuak a, “HMEICHHIA, HE TLÂNGAH KHER LO PAWH, PA CHIBAI AN BÛK HUN A THLENG DAWN…” tiin (John 4:21-26). Judate chuan, Jerusalem khawpui leh Jerusalem Temple-ah chauh Pathian a awm a, a inpuang ţhinin an hria a. Ram hla takah Saltângin awm mahse, Jerusalem chu an theihnghilh palh hial pawh an hlauva, “Aw Jerusalem, ka theihnghilh che chuan, ka kut dinglam hian a thil thiam hi theihnghilh ve rawhse. Ka hriat rêng loh che chuan, ka lei hi ka dangah bet tlat rawhse; ka hlimna ber aia Jerusalem ka duh zawk loh chuan” tiin chhechhamin an intiam hial anih kha (Sam 137:5-6).

Lal Isua’n Jerusalem kher lovah pawh Pathian chibai an bûk hun a thlen tur thu a sawi khian, ‘Jerusalem leh Jerusalem Temple-ah khân Pathian a awm tawh lo,’ a tihna lam a ni lo. Judaten Pathian Inpuanchhuahna Hmun an ngai zim lutuk (Jerusalem-ah chauh Pathian awm nia an ngai) leh an ngaihdân dik lo kha a rawn sawifiah zawk a ni.

Hmanrua hi a rei lutuk chuan a hman tlâk tawh ţhin lova, thlâk a ngai ţhin. A Hmantlâk tawh lohna chhan hi A Petu Pathian vang a ni lova, A HMANRUA LEH A DAWNGSAWNGTU MIHRINGTE VANG ZAWK KHA A NI. Cellphone ka neih hmasak ber chu, Kum 2001 khân a ni a. Bangalore-ah, M.Th ka zir laiin Rs.2600/- NOKIA 3310 (Black & White) ka lei ve a. Duhthlan tur model dang pawh a awm lo. Color pawh ala chhuak lo. Tunah erawhchuan, Cellphone changkâng tak tak Rs.60,000/- chuang man lai te pawh a awm tawh zuk nia!!! A Hmangtu-tur duhthusam ang siam kha Company thil tum a ni.

Pathian Hmanrua rêng rêng hi, A PETU PATHIAN AIA A HMANRUA KHA KAN PATHIAN DAWN EMAW, KAN HNE (NING/NGAIAH NEI) EMAW A NIH CHUAN, PATHIANIN A HMANRUA KHA A THLÂK MAI ȚHIN. A châng phei chuan, Amah Pathian Thutiam Tihngheh nân, Amah Pathian ngeiin a pêk a hmanrua kha a TI-MUALPHO HIAL ȚHIN. E.g. Jerusalem & Jerusalem Temple pawh, Pathian Mitthla-tirtu tur leh Pathian lam hawitirtu tur atân a pe a. Mahse, A Petu Pathian aia an ngaihsak zawk tâk avangin Pathianin Jerusalem khawpui leh Jerusalem Temple chu a ti-mualpho a, a ti-tlâwm mai!!!

Kêlkâng, Harhna Thlenna Hmun hi Lalpa’n Hmanrua atân a hmang nasa hle mai, Pathian ropuina pawh a lang nasa. Mahse, Pathianin tâwk a tih hunah chuan ala Thlâk ve leh ang a, Hmanraw dang a rawn hmang leh ang. Hei hi LALPA REMRUAT ZEL A NI. Pathianin a Hmanrua a thlâk nachhan pakhat chu, Lalpa aia kha Lalpa Hmanrua kha kan pathian a, kan Chapopui (chhuang/uanpui) ţhin vang a ni. Lalpa Hmanrua hi Amah Lalpa Pathian aia a lansârh dawn chuan, thlâk mai kha Lalpa’n ţha a ti niin a lang.

Kan Ram, Kohhran, Bial leh Assembly/Synod Puipâte zingah pawh, Hruaitu Duhawm tak tak-te Mual an liam a, anmahni thlâktu mithar an lo awm zel ţhin hi Lalpa remruat a ni. An inthlâk zel ang, Sakawl chu Sakawlin, Sial râng chu Sial rângin a rawn thlâk zel ang. Hruaitute hian an “Hmun Ngai” (Same Post/Position/Status) an luah rei lutuk chuan, an dinhmun kha an pathian a, tisa leh thlarau lamah an dal tial tial a, mite tân ei tur an chhuah tlêm tial tial ţhin. Hei hi thudik leh tlâng hriat a ni.

MAHSE, HEI ERAWH HI CHU HRE RENG ILA. Hmanraw Thar a rawn awm tâk avangin, Hmanraw Hlui kha a Hmantlâk tawh lo tihna a ni lova, a chhia a, paih mai tur a ni, tihna pawh a ni hek lo. A Thar avang khân a Hlui kha a hlui mai chauh a ni. A Hlutna a bo chuang lo. Sap Thufingin, “Old is Gold” an tih kha a dik zawk chu a ni. Pathianin a Mite Kaihhruaina tur leh Tih-harhna atâna Hmanrua a hman rêng rêng-te hi a ţha vek a, an ţangkai vek a. Hnual-suat mai mai leh Hlui-hlawn mai mai theih an ni lo. An ţangkaina mual ala awm zel ang a, an ţangkai hunbi dang a rawn in herchhuak leh ţhin ang.

Kêlkâng Zawha Lalpa Tlâng ruat dang lo awm tur chu, Nangmah emaw, in Kohhran emaw, he kan Ram, Zoram ngei pawh hi a ni thei a ni. Pathian Thutiam a ding reng mai, “TIHNUAM TAK LEH THUAWIH TAKA IN AWM CHUAN, IN RAMA THIL ŢHA-TE HI IN EI ANG” (Isai 1:19). PATHIAN THLARAU THIANGHLIM PÂWLNA LEH MALSAWMNA DAWNGTU TUR MIHRING LEH KOHHRAN LEH RAM CHU A THUAWIH APIANG, A TIHNUAM APIANG AN NI MAI DAWN A NI. THINLUNG ZAWNG ZAWNGIN THUAWIH TAK LEH TIHNUAM TAKIN THLARAU THIANGHLIM I LO DAWNG-SAWNG EM LE???

4. THU TLÂNGKAWMNA
Khawvela ram ţhenkhatah chuan, Hlimna leh Lawmna hun an hman hnu-ah, Chhiatna râpthlâk takin a zui tih te sawi tur a awm a. Kêlkâng Harhna hi Tu-Thuhriltu rawngbawlna avang mah ni lova, Zoram-in heti khawpa a rampum huapa Harhna ropui leh mak danglam tak mai kan tawng a, kan hlawkpui a, kan chen mêk hi, en liam mai mai chi a ni lo. Ngaihtuahna thui tak sen a ngai a ni. Pathianin, he Kêlkâng Harhna Zawhah hian Eng-ang Hunah nge min luhpui dawn??? tih hi ngaihtuah tham a awm. Chuvangin, he Hun hlu tak hi hlawk taka kan hman a ţul hle. Chuvangin, Hei hi tih i tum teh ang aw…
Lalpa’n tlâng min ruat sak hi i zawng zel ang aw,
Lalpa tlâng ruatah ngei awmhmun rem i tum ang aw,
Lalpa min duhna hmunah ngei awm i tum tlat ang aw,
Lalpa duhzawng chauh tih i tum tlat ang aw,
Lalpa ram lâk tumin, harsatna kârah pawh i kal zel ang aw…

(((Adapted From My Message At Saiha Presbyterian Church On May 10, 2015 (Sunday)))

1st. Monday: May 18-26, 2015 chhunga Ranchi-a India ram pum huap Sub-Junior Hockey Tournament-a champion Mizoram hmeichhe hockey team-te chu Mizoram State Sports Council (MSSC)-in an pisaah lawmpuina hun an hmang a; ZOHANDCO chairman R.Vanlalvena, MLA-in a hmanpui. 5th Sub-Junior Hockey India National Championship 2015 (Women)-ah hian Mizoramin final-ah Patiala chu 9-0 a hnehin an champion a; a hmain Vidharbha 16-0 in, Uttarakhand 29-0 in, Chandhigarh 3-2 te in an lo hneh tawh bawk a ni.

2nd. Tuesday: Disaster Management & Rehabilitation department leh Serchhip District Disaster Management Authority-te chuan Serchhip High School naupangte nen chhiatrupna thlen thulha chêt lak dan tur a taka zirna, mock drill an nei.

3rd. Wednesday: Saiha ‘Multipurpose Community Hall’ sak thar chu MADC chief executive member RT Zachono-a’n a hawng. Hall hi BRGF sum cheng nuai 190/- sênga sak a ni.

4th. Thursday: Khawzawl Group YMA chuan Khawzawl Zuchhip YMA Hall-ah blood donation camp an huaihawt a, Aizawl Civil Hospital tan thisen unit 225 an pe a, a petute mipa 196 leh hmeichhia 29 an ni.

5th. Friday: Bawlhhlawh phûr LPK 407 truck MZ-01 D-9776, John Timothy Hmar (35), Churachandpur, Manipur khalh, Mc Donald Hill panna kawng chung bera chhuk zawnga tlan thla chuan mihring leh lirthei eng emaw zat a sû a, a sut zinga mi Zoremliana Hauhar (29) s/o Lalzarliana Hauhnar, Zarkawt a thi. Truck khalhtu John Timothy Hmar chuan truck hi a brake a fail niin a sawi.

6th. Saturday: Young Men’s Christian Association (YWCA), Aizawl chuan Enginering Officers’ Club-ah Annual General Conference an hmang a, YMCA din champha vawi 171-na an lawm nghal.

7th. Sunday: Central YMA hnuaia SRS-te chuan Dinthar Veng thlanmual bulah C.Ngunlianchunga s/o Lalbiakchhunga, Myanmar nia insawi kut aṭangin heroin can 2 an man a, a hnuah Dinthar Venga a chenna inah heroin hawng khat tling lo deuh mansak leh a ni. SRS hian heroin leh a neitu hi Excise & Narcotics hnenah an hlan nghal.

8th. Monday: Lok Sabha MP CL Ruala’n model village atana a thlan Khawlailungah model village atana hmalakna chi khat atan thing ṭiak phun a ni. Thing phun hnatlangah hian mi 500 chuang an thawk chhuak a, hlawm 11-ah inṭhenin thing ṭiak ṭhahnem tak an phun a ni.

9th. Tuesday: Mizoram pawn hmun hrang hranga lehkha zirte chuan Aizawlah Summer Sports an ṭan a, Zarkawt Recreation Centre-ah MJA president Vanlalrema Vantawl-in a hawng. Kumina Summer Sports hi a vawi 15-na a ni a, June 11 thleng neih a ni ang. Delhi, Pune, Kolkata, Bangalore, Jalandhar, Chandigarh, Chennai, Hyderabad, Imphal, Nagpur, Allahabad leh Shillong-a Mizo zirlaite an tel a; basketball, football, inkawibah, spoon race leh inhruipawhte hmangin an inel dawn a ni.
10th. Wednesday: Aizawl District Anti Tobacco Squad chuan meizial leh Gutkha chi hrang hrang dan kalha sumdawngte zawrh lai an man khawm, cheng nuai khat chuang man chu State Refferal Hospital-a bawlhhlawh hâl ralna hmunah an chairman, Dr Franklin Laltinkhuma, Aizawl DC-in a hâl ral.
11th. Thursday: Mizoram sorkar-in NLUP sum, Bank-a dah pung atangin Kelkang khaw mipuite chhawmdawl dan tur a ruahman. CM, Pu Lal Thanhawla, Minister dangte, NLUP Implementing Board Chairman, Pu JH Rothuama leh Champhai Bawrhsap, Pu H..Lalengmawia’n hemi chungchang hi NIB Conference Hall-ah an sawiho a, Kelkang khuaa harhna chhim, mi tam takin hun rei tak chhung Kelkang khua hi an tlawh tawh avang leh thlawhhma pawh la hman lo leh anmahni hna dang pawh thawk hman lova an awm avangin a bikin tanpuina pek ni se an ti a ni.

12th. Friday: Damlote tana thisen pe thintute pual ni, World Blood Donor Day chu I&PR Auditorium-ah hman a ni a, Home Minister, Pu R.Lalzirliana’n a hmanpui. He hunah hian kum 2014-2015 chhung pawl leh mimal thisen pe thate hnenah lawmman hlan an ni a, sakhaw pawl zinga tum khata pe tam ber, TKP Aizawl Coordination-in unit 200 an pe a, YMA hminga tum khata pe tam ber, Chanmari West YMA-in unit 161, zirna in hminga tum khata pe tam ber, Pachhunga University College-in unit 509 an pe bawk a, anni bakah hian pawl hrang hrang, thisen pe tamte leh mimala pe tam, unit 58 pe tawh, Tv. C.Lalremruata, Electric Veng leh unit 40 pe tawh, Pi Rebecca Saimawii, Khatla te leh vawi 20 thisen pe tawhte pawh thilpek hlan an ni. World Blood Donor Day hi June ni 14 a ni na a, kuminah hian Pathianni a nih avangin vawiin khan hman a ni.

13th. Saturday: Indian Institute of Entrepreneurship (IIE) buatsaihin I&PR Auditorium-ah Stakeholders intawhkhawmna neih a ni a. He intawhkhawmna hmang tur hian New Delhi atangin India Infrastructure Finance Company Ltd. (IIFCL) Chairman cum Managing Director Pu SB Nayar pawh a lo tel. IIE hi Ministry Of Skill Development And Entrepreneurship hnuaia pawl pakhat niin hmar chhak state ah IIFCL-NSTFDC project an kalpui a. He project in a tum ber chu hmarchhak biala tlangmite chu kut themthiamna zirtira eizawnna tha tak an neih theihna tura dawmkan a ni.

14th. Sunday: Baptist Youth World Day of Prayer a ni a, hemi ni hian Mizoram Thalai Kristian Pawl chuan an thu rel bawhzuiin thalai, Lal Isua nei loten Lal Isua an neih theihna turin Thalai Kristian Pawl member-te chu an mahni Unit-ah chaw ngheiin an tawngtai a ni. MTKP Organizer, Rev. Samuel Lalremsanga leh MTKP hruaitu dangten Saiha-a Pastor Bial pahnihin District meet an buatsaih chu hmanpuiin, chaw ngheia tawngtaiah an tel a ni.

15th. Monday: Mizoram pumah leh ram chhung hmun dangah YMA Day, hlim taka lawm a ni. Tun tum hiYMA Day vawi 81-na a ni a; branch tinin an huam chhung theuhah thil tha tih nan leh mi dangte tana thil tangkai tih nan an hmang hlawm. Central YMA hruaitute leh Sub-Hqrs YMA hruaitute pawhin YMA Day hi Branch hrang hrangah an hmanpui hlawm.

16th. Tuesday: Zankhat riaka lo zin Union Minister of State for Panchayati Raj Pu Nihalchand leh Mizoram Governor Lt. General Nirbhay Sharma PVSM, UYSM,AVSM, VSM (Retd) chuan Raj Bhavan ah inkawmna hun tha tak an nei. Governor chuan Mizoram chu hmun kilkhawr takah awm mahse ramdang Myanmar leh Bangladesh nen ramri an intawm avangin hmun pawimawh tak anih thu Minister chu a hrilh.

17th. Wednesday: April 24, 2015 aṭanga bo, Hrangliantawna (55), Zuangtui Veng chu Kelkang aṭanga km. 5 vela hlaah thía chhar a ni. Hrangliantawna hi Kelkang harhna chhimin an kal a, April 24-ah a thlenna in aṭanga a chhuak chu a awmna chin hriat lohin a awm a ni.

18th. Thursday: Rosangzuali (1) d/o Sangmuanthanga, Hnahlan chu an ṭhenawmte tuizémah a tla a, damdawi-in panpui a nih laiin a thi.

19th. Friday: Governor Lt.Gen. Nirbhay Sharma chuan Aizawl Civil Hospital (ACH) a tlawh a; damdawi man tlawm zawrhna, Jan Aushadhi Store (generic drug store) chu mipuite’n tun aia an hman ṭangkai zawk theih nana ṭan la turin thawktute a chah. Governor hian damlo harsate tan Aizawl Civil Hospital hotute hnenah Rs. 20,000/- a hlan nghal a ni.

20th. Saturday: Kolkata Mizoram House-a additional resident commissioner Talo Rosanga (49) s/o Rev. Rokhuma Mission Vengthlang chu Culcutta Medical Research Institute (CMRI)-ah a thi. Talo Rosanga hi MCS a ni a, a thih chhan hi natna danglam tak, Hemophagocytic lymphohistiocytosis (HLH) nia hriat a ni.
21st. Sunday: United Nations Organisation in June ni 21 hi khawvel pum huapa “International Day of Yoga” a hman tura a tih angin Serchhip-ah pawh he hun hi hman a ni a, Chief Medical Officer, Serchhip District, AYUSH Department leh Nehru Yuva Kendra Sangathan (NYK) Serchhip tangkawp buatsaihin Chief Medical Officer’s Conference Hall, Serchhip ah inkhawm buatsaih a ni a, Serchhip khawchhunga sawrkar pisa hrang hrang hotu ten he hun hi an hmanpui a ni. International Day of Yoga puala inkhawm hi Dr. Laldawngliana Sailo, CMO Serchhip District-in a kaihruai a, Dr. Lalkhawngaihi Renthlei, M.O. (AYUSH) hnen atang Yoga awmzia leh nihphung powerpoint presentation hmanga hrilhfiah a ni bawk. International Day of Yogahi kumin hi khawvelin a vawikhat hmanna a ni.
22nd. Monday: Information & Public Relations department-a IPRO Neil Zozamliana (46) s/o Dr C.Silvera chu cancer avangin a thi.Neil Zozamliana hian a nupui Rosangluri leh a chhungte a kalsan.
23rd. Tuesday: Florence V.Lalpekhlui, HSSLC Examination 2015-a Science-a palina leh Mathematics-a mark hmu sang ber chu a awmna Sangau sub-headquarters LSA huaihawtin Sangau khuaa pawl hrang hrangte’n an chawimawi. Florence V.Lalpekhlui hi Mizoram State Technical Entrance 2015 exam-ah Medical-ah hian 14-na leh Engineer-ah pahnihna a ni bawk.
24th. Wednesday: Mizorama dam lai zinga upa ber nia hriat Pi T.Chiadi (109) chu nat lawkna engmah awm lovin Lalpa’n a hnen ah a hruai ta. T.Chiadi hi Mizorama dam lai zinga upa ber nia hriat a ni a; amah hi kum 1906-ah Zawnglingah a piang nia sawi a ni. Kum 1933-ah B.Heiko nen an innei a, fa pakua an nei a, tu leh tuchhuan 98 an nei bawk. A pasal chu kum 1996-ah kum 96 mi niin a thi tawh a ni. 2010 khan Mizoram a upa ber a thlan a ni a, Govt. of Mizoram chuan Certificate mawi tak leh Pawisa fai Rs.1000/- a chenna in ah ngei a hlan a ni. Certificate ah hian a hun lai a Social Welfare changtu Minister in a hming a sign nghe nghe a ni.
25th. Thursday: I & PR Conference Hall ah khuarel chhiatna lo thlen thulha inven dan tur leh hmalak dan tur zir ho na Training of Incident Response System Team for Preparation of Mock Drill neih a ni a. Minister of DM & R Pu C.Ngunlianchunga’n a hmanpui.
26th. Friday: Bilkhawthlir Kualmawi Branch YMA chuan an veng YMA Hall-ah blood donation camp an huaihawt a, Kolasib District Hospital tan thisen unit 58 pe a, a petute mipa 40 leh hmeichhia 18 an ni.
27th. Saturday: Kelkang khaw chhung mipuite zinga sorkarin a bika a tanpuina a sem tur hnuaia vawk vulh thei tura in report mi 216 hnenah vawkte sem a ni. Vawk vulh tur te hi chhungkaw khatah vawkte pahnih zel a sem a ni. Kelkang Community Hall-a tanpuina semnaah hian Champhai Bawrhsap Pu H.Lalengmawia leh Champhai District AH&Vety Officer Dr. Lalchungnunga Pudaite bakah Vety Officer dangten an telpui a ni.
28th. Sunday: Sihphir Pastor Bial KTP chuan kumtina an tih thin dan angin Half Year Meet Sihphir kohhran Biak Inah an hmang. Meet thupui ‘Thalaite leh rawnbawlna’ tih chu Synod Revival speaker Upa C.Ngurthantluanga’n a sawi a ni. Meet naah hian speaker rawn tawiawmin Nl Zoramchhani, Mizo Icon hmasa ber pawh telin a ni hian zaiin kohhran mipui a awi bawk. Meet hlawhtling taka hman a niin Thlarau lam boruak pawh a tla tha thawkhat hle. Meet hi 27th. Saturday zan atanga neih tan a ni.
29th. Monday: Mizoram Table Tennis Association (MTTA) leh Zonet Cable Network-te chuan thawhhona thuthlung an ziak fel a, Mizoram-a table tennis inelna ropui leh lawmman tamna ber tur Mizoram Hexa League (MHL) buatsaih an tum. MHL hi table tennis game tih lar nan leh tih hmasawn nana buatsaih tur a ni a, September leh October, 2015 chhung a khelh tura ruahman a niin Inelnaah hian team paruk an awm ang a, team tinah hian player paruk zel an awm bawk ang.

30th. Tuesday: India sorkar leh Mizo National Front (MNF) ten June 30, 1986-a inremna thuthlung an ziah champha, Remna Ni a ni a, political party hrang hrangin an lawm a; sorkarin programme a siam lo thung.

Electric plug leh socket te
India ram a kan hman ho te chu two pin(Type C), three pin(Type D, 5 ampere) leh three pin lian, power plug kan tih mai (Type M, 15 ampere) te hi a ni. Microwave, Geyser etc.. current heh deuh ti mai ang connect nan power plug ( three pin lian 15 amp) hi hman a ni.

Hetah hian a lem nen han bihchiang ve la
http://www.worldstandards.eu/electricity/plugs-and-sockets/

I phone charger kha wall socket ah thun in tum, a leng lo tlat mai. A pin aia a khua a len zawk chuan 15 amp socket a niang. 15 amp to 5 amp converter plug I mamawh a ni. I microwave lei thar kitchen a wall socket an leng lo tlat mai bawk a. A khua aia a pin a len zawk chuan kitchen-ah khan power plug, 15 amp wall socket i lo dah lo anih hmel. 5 amp to 15 amp converter I mamawh a ni. I hmang reng dawn a nih chuan, Electrician ko la, power plug a thlak tir mai a tha zawk ang.

Anih, 5 amp wall socket ah hian 15 amp converter hmang in geyser, OTG oven vel connect theih a mi? A plug a hi thun thei pawh ni se, current in a zo a ngem? MCB a trip a ngem? Converter plug i lei hma in, a siamtu in a sawi dan uluk takin bihchian a tha ang. Tin, electrician rawn a tha ang.

Ka hrethui lo khawp mai. Mahse i tangkai ve pui ngei ka ring.

Ara, wrench, screw driver hman dan
Mizo hi chuan kan thiam vek awm e. Han chhiar ve reng reng teh.

Wrench chi hrang hrang, ring, open, adjustable, allen key etc.. leh a hman dan
http://www.artofmanliness.com/2013/03/05/toolmanship-your-complete-guide-to-wrenches/

Mizo in “dal” wrench kan tih mai hi “dial” tih atanga kan hriat fuhloh emaw ni. Open wrench an ti mai. Inhmuhsitna lam ni lovin, driver, handyman leh mechanic atanga kan hriat hi tamtak diklo hi a awm ve. Han “rez” vak teh as opposed to “rev”. Sikawpzervar as opposed to “shock absorber”. “Chechiz” as oppose to “Chassis, pronounced chaasi”.

Hetiang hi ka chah mek a, an fak ang hian tha tak ang maw
http://www.amazon.in/Snap-n-Grip-SeaLux-Snapn/dp/B00IYLUBA6

Ara chi hrang hrang leh a hman dan
http://www.artofmanliness.com/2009/11/03/toolmanship-how-to-use-a-handsaw/

Screw driver chungchang
http://www.artofmanliness.com/2010/02/18/toolmanship-how-to-use-a-screwdriver/

Tuboh chungchang leh a hman dan
http://www.artofmanliness.com/2009/09/29/how-to-use-a-hammer/